बिहारच्या दरभंगामधून एक धक्कादायक घटना समोर आली आहे. अनैतिक संबंधातून पोल्ट्रीफार्म मालकाची निर्घृण हत्या करण्यात आली आहे. पोल्ट्रीफार्म मालकाच्या हत्येने परिसरात खळबळ उडाली आहे. २६ वर्षीय गोलू कुमार सिंह असे हत्या झालेल्या पोल्ट्रीफार्म मालकाचे नाव आहे. गोलू १५ नोव्हेंबरपासून बेपत्ता होता. पोलिसांनी त्याचा तपास सुरु केल्यानंतर २० नोव्हेंबर रोजी त्याचं शीर कापलेलं धड आढळलं. तर धड सापडल्यानंतर दुसऱ्या दिवशी शीर आढळलं.

गोलू कुमार सिंह हा समस्तीपूर-दरभंगाच्या बॉर्डरवरील किशनपूर बैकुंठ या गावातला रहिवाशी होता. गोलू हा भरवाडी गावात पोल्टीफार्मचा मालक अचानक बेपत्ता झाला. पोलिसांत गुन्हा नोंदवल्यानंतर त्याची शोधाशोध सुरु झाली. त्यानंतर पाच दिवसांनी त्याचं शीर कापलेलं धड सापडलं. तर दुसऱ्या दिवशी धडापासून कापलेलं शीर हे ५० मीटर दूर अंतरावर सापडलं.

मृत तरुणाच्या भावाचा गंभीर आरोप

गोलूचा मोठा भाऊ संजीत कुमार सिंह यांनी सांगितलं की, गावातील एका विवाहित महिलेशी त्याच्या भावाचे प्रेमसंबंध होते. त्या महिलेचा पती संजीत शर्मा याने त्याची पत्नी निर्मला देवी आणि चार लोकांच्या मदतीने मिळून हत्या केली,असा आरोप मृताच्या भावाने केला.

विवाहित महिलेने गोलूकडून लाखो रुपये घेतले होते. गोलूने दिलेल्या पैशांमधून महिला ऑनलाइन शॉपिंग करायची. कुटुंबाचा आरोप आहे की, गोलू चांगला कमाई करायचा. यामुळे महिलेने गोलूला जाळ्यात अडकवलं होतं. संजीत याने गोलूला फसवून गावापासून २ किलोमीटर दूर नेलं. त्यानंतर त्याची गळा आवळून हत्या केली. त्यानंतर त्याचं शीर हे धडावेगळं केलं.

कुटुंबाचा आरोप आहे की, गोलू याच्या हत्येचं षडयंत्र रचण्यात आलं होतं. गोलूचे मार्च महिन्यात लग्न होणार होते. आई नीलम देवीने रडत रडत दोषींना फाशी देण्याची मागणी केली आहे. वडील बिजेंद्र सिंह यांनी म्हटलं की, म्हातारपणात दोषींनी आमचा आधार हिरावून घेतला आहे'.