August 15 Independence Day: भारतात आज सर्वत्र मोठ्या उत्साहात ७७ वा स्वातंत्र्य दिवस साजरा होत आहे. लाल किल्ल्यावरुन भारताचे पंतप्रधान नरेंद्र मोदी स्वातंत्र्य दिनी जनतेला संबोधित करत आहेत. यावेळी मोदींनी भाषणाच्या सुरुवातीलाच मणिपूर हिंसाचारावर भाष्य केलं. (Latest Marathi News)

पंतप्रधान मोदी म्हणाले की, "मणिपूरमध्ये (Manipur) काही दिवसांपूर्वी हिंसाचार सुरू होता. मात्र काही दिवसांपासून सातत्याने शांततेच्या बातम्या येत आहेत. संपूर्ण देश मणिपूरच्या जनतेसोबत आहे. लोकांनी शांततेत आणि उत्साहाने स्वातंत्र्य उत्सव पुढे न्यावा. शांततेनेच सर्व प्रश्नांवर मार्ग निघेल. केंद्र आणि राज्य सरकार शांतता राखण्यासाठी सर्वतोपरी प्रयत्न करत आहेत आणि करत राहतील."

सकाळी ७ वाजता पंतप्रधान मोदींच्या (PM Narendra Modi) हस्ते स्वातंत्र्यदिनी लाल किल्ल्यावर ध्वजारोहण करण्यात आले. त्यानंतर हवाई दलाच्या हेलिकॉप्टरमधून पुष्पवृष्टी करण्यात आली. लाल किल्ल्यावरून पंतप्रधान मोदींनी आपल्या भाषणाला सुरूवात केली.

"जगातील सर्वात मोठी लोकशाही आणि लोकसंख्येच्या बाबतीतही आघाडीचा देश भारत आहे. एवढा मोठा देश, माझ्या कुटुंबातील १४० कोटी सदस्य आज स्वातंत्र्यदिन साजरा करत आहेत. भारताच्या स्वातंत्र्यलढ्यात योगदान देणाऱ्या सर्व शूरवीरांना मी श्रद्धांजली अर्पण करतो. तसेच सर्व नागरिकांना स्वातंत्र्य दिनाच्या हार्दिक शुभेच्छा. ", असं मोदींनी म्हटलं.