PM Modi : पंतप्रधान नरेंद्र मोदी भारत-ऑस्ट्रेलिया यांच्यातील चौथा कसोटी सामन्याला हजेरी लावणार आहेत. भारत-ऑस्ट्रेलिया यांच्यातील कसोटी सामना अहमदाबादच्या मोटेरा स्टेडियमवर आजपासून सुरु होत आहे. ऑस्ट्रेलियाचे पंतप्रधान अँथनी अल्बनीज यांच्यासोबत मोदी कसोटी सामन्याला उपस्थित राहणार आहेत.

पंतप्रधान नरेंद्र मोदी जवळपास दीड तास स्टेडियममध्ये राहून खेळाडूंना भेटणार असल्याची माहिती मिळत आहे. पंतप्रधान मोदींच्या शेड्युलनुसार ते ऑस्ट्रेलियन पंतप्रधानांसोबत 8:30 वाजता स्टेडियममध्ये पोहोचतील. मोदी आणि अल्बानीज यांची भेट हा भारत आणि ऑस्ट्रेलिया यांच्यातील मैत्रीला 75 वर्षे पूर्ण झाल्याच्या समारंभाचा एक भाग आहे. (Sports News)

सामन्याला त्या दिवशी एक लाख प्रेक्षकांची उपस्थिती अपेक्षित आहे. एकाच वेळी एवढ्या मोठ्या संख्येंनी प्रेक्षकांची उपस्थिती हा देखील एक विक्रम असेल. भारतात यापूर्वी सर्वाधिक प्रेक्षक ईडन गार्डन्सवर उपस्थित होते. पंतप्रधान नरेंद्र मोदी आणि ऑस्ट्रेलियाचे पंतप्रधान सामन्यादरम्यान कॉमेंट्री देखील करू शकतात.

सामन्यासाठी 75 हजार तिकिटांची विक्री झाली आहे. स्टेडियमच्या बाहेरील परिसरात दोन्ही पंतप्रधानांचे फोटो असलेले अनेक होर्डिंग्ज लावण्यात आले आहेत. साईटस्क्रीनसमोर एक छोटा स्टेज तयार करण्यात आला आहे. जिथे सामना सुरू होण्यापूर्वी एक छोटा कार्यक्रम होईल.