Court News : आजकाल अनेक घटस्फोटांची प्रकरणे समोर येत आहेत. अशाच एका घटस्फोटाच्या केसची चर्चा होत आहे. एका फ्रेंच महिलेने तिच्या पतीकडे घटस्फोट मागितला होता. तेव्हा न्यायालयाने तिलाच दोषी मानले होते. वैवाहिक जीवनात शारीरिक संबंध न ठेवल्याने घटस्फोट झाला असे फ्रेंच न्यायालयाने म्हटले होते. या निर्णयावर आपेक्ष घेत महिला सर्वोच्च मानवाधिकार न्यायालय पोहोचली होती.

'घटस्फोटाच्या प्रकरणात न्यायालयाने शारीरिक संबंधांसारख्या संवेदनशील विषयामध्ये हस्तक्षेप करणे योग्य नव्हते', असे फ्रेंच महिलेचे ठाम मत होते. या प्रकरणावरुन तिने युरोपातील सर्वोच्च मानवाधिकार न्यायालय गाठले. मानवाधिकार न्यायालयात यावर पुन्हा सुनावणी झाली. तेव्हा न्यायाधीशांनी 'शारीरिक संबंध ठेवणे हे वैवाहिक कर्तव्य नाही' असे म्हणत फ्रेंच महिलेच्या बाजूने निकाल दिला.

मिळालेल्या माहितीनुसार, फ्रेंच महिलेचे नाव एच. डब्ल्यू आहे. तिचा जन्म १९५५ मध्ये फ्रान्समध्ये झाला होता. १९८४ मध्ये तिचा विवाह झाला. चार मुलं झाल्यानंतर तिने पतीकडे घटस्फोटाची मागणी केली. तेव्हा न्यायालयाने 'पतीशी शारीरिक संबंध ठेवत नाही' या कारणावरुन तिला दोषी ठरवले होते. यामुळे महिलेला त्रास सहन करावा लागला होता.

२००४ पासून पतीशी शारीरिक संबंध ठेवले नसल्याची माहिती महिलेने दिली होती. शारीरिक समस्या आणि पतीकडे होणारी हिंसा यामुळे संबंध ठेवण्याची इच्छा झाली नाही असेही तिने न्यायालयाला सांगितले होते. युरोपीय मानवाधिकार न्यायालयाने महिलेचे बाजू समजून घेतली आणि निकाल दिला.