लोकसभा आणि राज्यसभेने वर्षासाठी त्यांच्या विभागाशी संबंधित संसदीय समित्यांच्या अध्यक्षांची फेरबदल करण्यात आली आहेत. रेल्वेच्या संसदीय समितीचे नवे अध्यक्ष म्हणून भाजपचे सुधीर गुप्ता यांची नियुक्ती करण्यात आलीय. यासह भाजपचे राधामोहन सिंह संरक्षणविषयक संसदीय समितीचे अध्यक्ष असतील. तर डीएमकेच्या कनिमोझी करुणानिधी यांची ग्राहक व्यवहार, अन्न आणि सार्वजनिक वितरण समितीच्या प्रमुखपदी पुन्हा नियुक्ती करण्यात आलीय. यात महाराष्ट्रातील ४० खासदारांना १५ समित्यांवर संधी देण्यात आलीय. लोकसभेतील २९ तर राज्यसभेतील ११ खासदारांना समितीवर घेण्यात आलंय. सुप्रिया सुळें यांच्यावरही मोठी जबाबदारी देण्यात आलीय.

दरम्यान काँग्रेसचे सप्तगिरी उलाका यांची ग्रामविकास आणि पंचायती राज समितीच्या अध्यक्षपदी आणि भाजपचे राजीव प्रताप रुडी यांची जलसंपदाविषयक संसदीय समितीच्या अध्यक्षपदी पुनर्नियुक्ती करण्यात आलीय. तर भर्तृहरी महताब यांची अर्थविषयक संसदीय समितीच्या अध्यक्षपदी नियुक्ती करण्यात आलीय.

१५ समित्यांवर महाराष्ट्रातील ४० खासदारांची वर्णी

शिवसेनेचे श्रीरंग बारणे यांची ऊर्जाविषयक संसदीय समितीच्या अध्यक्षपदी पुन्हा नियुक्ती करण्यात आलीय. सुनील तटकरे यांच्याकडे पेट्रोलियम समितीचं अध्यक्षपद देण्यात आलंय. यासह नारायण राणेंची कृषी तर सुप्रिया सुळेंची वित्त समितीवर निवड करण्यात आलीय. त्याचप्रमाणे, भाजपचे राधा मोहन दास अग्रवाल यांची गृहविषयक संसदीय समितीच्या अध्यक्षपदी पुन्हा नियुक्ती झालीय. दरम्यान भाजपच्या मेधा विश्राम कुलकर्णी या विज्ञान आणि तंत्रज्ञान, पर्यावरण, वने व हवामान बदलविषयक संसदीय समितीच्या अध्यक्षपदी कार्यरत राहतील. याव्यतिरिक्त, भाजपचे निशिकांत दुबे यांची दळणवळण आणि माहिती तंत्रज्ञानविषयक संसदीय समितीच्या अध्यक्षपदी पुन्हा नियुक्ती करण्यात आलीय.

काँग्रेसचे खासदार शशी थरूर यांची परराष्ट्र व्यवहारविषयक स्थायी समितीच्या अध्यक्षपदी फेरनियुक्ती करण्यात आली आहे, तर पंजाबचे माजी मुख्यमंत्री चरणजित सिंग चन्नी हे कृषीविषयक समितीचे अध्यक्ष म्हणून काम पाहणे सुरूच ठेवतील; त्याचबरोबर, जेडी(यू)चे राज्यसभा खासदार संजय कुमार झा यांची परिवहनविषयक संसदीय समितीच्या अध्यक्षपदी फेरनियुक्ती करण्यात आली आहे. याव्यतिरिक्त, भाजपचे अनुराग ठाकूर हे कोळसा, खाणकाम आणि पोलादविषयक संसदीय समितीचे अध्यक्ष म्हणून आपली जबाबदारी सांभाळणे सुरूच ठेवतील.