पहलगाम दहशतवादी हल्ला झाल्यानंतर देशभरात संतापाची लाट पसरलीय. भारत सरकारने कठोर भूमिका घेत पाकिस्तानला कोंडीत पकडलंय. तर दुसरीकडे पहलगामध्ये दहशतवादी हल्ला करणाऱ्यांना शोधण्यासाठी सुरक्षा दलाकडून शोध मोहीम राबवत जात आहे. जम्मू-काश्मीरमध्ये जागोजागी छप्पेमारी करण्यात येत आहे. भारताची ही कारवाई पाहून पाकिस्तानात भीतीचं वातावरण पसरलंय. भारत मोठी लष्कर कारवाई करेल या भीतीने दहशतवादी पीओके सोडून पळू लागले आहेत.

भारत लष्करी कारवाई करेल अशी शक्यता असल्याने पाकिस्तानमध्ये भीतीचे वातावरण आहे. पाकिस्तानने पीओकेमधील लाँच पॅडवरून दहशतवाद्यांना काढून सुरक्षित ठिकाणी नेण्यास सुरुवात केलीय. यासोबतच बहावलपूरमधील जैश-ए-मोहम्मद आणि मुनिरके येथील लष्कर-ए-तैयबाच्या मुख्यालयातूनही दहशतवाद्यांना तेथून हटवलं जातंय.

भारताने आतापर्यंत दोनदा स्ट्राइक करत दहशतवाद्यांना कंठस्नान घातलंय. त्यामुळे भारत पुन्हा सर्जिकल किंवा एअर स्ट्राइक करेल ही भीती असल्याने पाकिस्तान तेथील दहशतवाद्यांना वाचवण्याचा प्रयत्न करत आहे. भारतीय सुरक्षा एजन्सींनुसार, पहलगाम दहशतवादी हल्ल्याच्या वेळीही, पीओकेमध्ये एकूण ४२ दहशतवादी लाँच पॅड सक्रिय होते. तर १३० हून अधिक दहशतवादी तिथे राहत होते. या लाँच पॅडमधून दहशतवाद्यांना जम्मू आणि काश्मीरमध्ये पाठवण्यात येत होते.

पहलगामवर हल्ला करणारे दहशतवादीही याच लाँच पॅडवरून भारतात घुसले होते. हे दहशतवादी लाँच पॅड पाकिस्तानी सैन्याच्या देखरेखीखाली काम करतात. ते त्यांना जम्मू आणि काश्मीरमध्ये घुसखोरी करण्यास मदत करतात आणि गरज पडल्यास भारतीय सुरक्षा दलांचे लक्ष विचलित करण्यासाठी गोळीबार देखील करत असतात.