बिहारचे मुख्यमंत्री नितीश कुमार यांना एका कार्यक्रमात मुस्लिम महिलेचा हिजाब ओढणे महागात पडलं आहे. नितीश कुमार यांच्या विरोधात पोलिसांत तक्रार नोंदवण्यात आली आहे. महबूबा मुफ्ती यांच्या मुलीने मुख्यमंत्री नितीश कुमार यांच्या विरोधात एफआयआर दाखल केली आहे. मुफ्ती यांची मुलगी इल्तिजा यांनी या प्रकरणाची माहिती सोशल मीडियावर पोस्ट करत शेअर केली आहे.

इल्तिजा यांनी पोस्ट करत म्हटलं की,'बिहारचे मुख्यमंत्री नितीश कुमार यांच्या विरोधात कोठी बाग पोलीस स्टेशनमध्ये तक्रार नोंदवली आहे. एका मुस्लिम महिलेचा हिजाब बळजबरीने ओढणे म्हणजे तिचा अपमान करणे होय. या प्रकरणात जम्मू-काश्मीरचे पोलीस लक्ष घालतील'.

नितीश कुमार यांनी हिजाब ओढल्याने त्यांच्यावर चहूबाजूने टीका होत आहे.इल्जिता यांनी हिजाब आणि बुरख्याचं समर्थम केलं . त्यांनी दाखल केलेल्या तक्रारीची प्रत देखील सोशल मीडियावर शेअर केली आहे.

इल्तिजा यांनी पोलिसांना म्हटलं की, 'सर, मी तुमचे लक्ष एका घृणास्पद घटनेकडे वेधत आहेत. या प्रकरणात मुस्लिम महिलांच्या भावना दुखावल्या आहेत'. इल्तिजा यांनी पत्रात म्हटलं की, 'बिहारचे मुख्यमंत्री नितीश कुमार यांनी एका युवा मुस्लिम डॉक्टर महिलेच्या चेहऱ्यावरील हिजाब ओढण्याचा प्रयत्न केला. ही बाब लाजीरवाणी आहे. यावेळी मंचावरील बिहारचे उपमुख्यमंत्र्यांसहित इतर लोक हसत होते'.

पीपल्स डेमोक्रेटिक पार्टीच्या नेत्या इल्तिजा मुफ्ती यांच्या तक्रारीवर भाजप नेते गिरीराज सिंह यांनी निशाणा साधला. गिरीराज सिंह यांच्या टीकेला प्रत्युत्तर देताना इल्तिजा यांनी म्हटलं की, 'या व्यक्तीचं तोंड स्वच्छ करण्यासाठी फिनेलची गरज लागेल'.