Delhi Mumbai हायवेवर शारीरिक संबंध केल्याप्रकरणी मनोहर लाल धाकडला अटक झाली होती. पण आज (२६ मे) त्याला जामीन देण्यात आला आहे. न्यायालयाने धाकडचा जामीन मंजूर केल्याचे म्हटले जात आहे. धाकडचा अश्लील व्हिडीओ सोशल मीडियावर व्हायरल झाला होता. या व्हिडीओमुळे त्याच्या अडचणींमध्ये वाढ झाली होती.

मिळालेल्या माहितीनुसार, दिल्ली-मुंबई हायवेवर अश्लील कृत्य केल्याप्रकरणी कथित भाजप नेता मनोहर लाल धाकडला काल (२५ मे) अटक करण्यात आली होती. पोलिसांनी धाकडला न्यायालयासमोर हजर केले होते. न्यायालयाने मनोहर लाल धाकडला तुरुंगात पाठवण्याचा आदेश दिला होता. पण आज धाकडला जामीन मिळाल्याची माहिती समोर आली आहे.

मनोहर लाल धाकड एका महिलेसोबत दिल्ली मुंबई हायवेवर शारीरिक संबंध करतानाचा व्हिडीओ लीक झाला होता. १३ मेच्या रात्री हा व्हिडीओ रेकॉर्ड झाल्याचा अंदाज वर्तवला जात आहे. अश्लील कृत्य करताना धाकड आणि महिलेने रस्त्याच्या मध्ये नाच केला होता. तेव्हा तैनात असलेल्या टोल कर्मचाऱ्यांनी सीसीटीव्ही फुटेज पाहिले. त्यांनी व्हिडीओ लीक करु अशी धाकडला धमकी दिली. पण त्याने पैसे देण्यास स्पष्ट नकार दिला. तेव्हा कर्मचाऱ्यांनी व्हिडीओ शेअर केला.

पोलिसांनी मनोहर लाल धाकडची चौकशी केल्यानंतर त्याला काल (२५ मे) अटक केली. त्याच्याकडे ज्या कर्मचाऱ्यांनी पैशांची मागणी केली होती याचा तपास पोलीस करत आहेत. त्या कर्मचाऱ्यांवरही कारवाई होईल अशी शक्यता वर्तवली जात आहे. यादरम्यान अटकेनंतर लगेचच दुसऱ्या दिवशी मनोहर लाल धाकडला जामीन मंजूर झाल्याने खळबळ उडाली आहे.