अरविंद केजरीवाल यांच्या आम आदमी पक्षानं दिल्लीची सत्ता गमावली असतानाच पंजाबमध्येही पक्षाला हादरे बसण्याची शक्यता आहे. प्रमुख विरोधी पक्ष असलेल्या काँग्रेसचे नेते प्रताप सिंग बाजवा यांनी केलेल्या दाव्यानं राजकीय वर्तुळात खळबळ उडाली आहे. आम आदमी पक्षाचे ३२ आमदार संपर्कात असल्याचा दावा बाजवा यांनी केला आहे.

आम आदमी पक्षाचे ३२ आमदार काँग्रेसमध्ये येण्यास उत्सुक आहेत. ते संपर्कात आहेत, असा दावा विधानसभेचे विरोधी पक्षनेते प्रताप सिंग बाजवा यांनी केला आहे. विधानसभा अधिवेशन सुरू होण्याआधीच बाजवा यांनी केलेल्या दाव्यामुळं राजकीय वर्तुळात खळबळ उडाली आहे.

पंजाबमधील सरकारनं कोणतीही कामे केली नाहीत. त्यामुळे सत्ताधारी आम आदमी पक्षाच्या आमदारांमध्ये नाराजी आहे. आमदारांना पक्ष बदलायचा आहे. महिलांना दर महिन्याला १००० रुपये देण्याचे आश्वासन दिले होते, ते सुद्धा या सरकारने पाळले नाही. निवडणुकीत हे आश्वासन दिले होते, अशी आठवणही बाजवा यांनी करून दिली.

राज्यातील भगवंत मान सरकारला हे विधानसभा अधिवेशन फार दिवस चालू द्यायचं नाही. भीतीपोटी आम आदमी पक्षाच्या नेतृत्वाला मुख्यमंत्री बदलायचा आहे. भगवंत मान यांच्याऐवजी दुसऱ्या एखाद्याकडं राज्याचं नेतृत्व द्यायचं आहे, असा खळबळजनक दावाही बाजवा यांनी केला.

दिल्ली विधानसभा निवडणुकीतील पराभवानंतर आम आदमी पक्षाचे संयोजक अरविंद केजरीवाल यांनी एक बैठक बोलावली होती. त्यात पंजाबच्या सर्व आमदारांना बोलावण्यात आलं होतं. पण ही बैठक बोलावण्यामागचं कारण काही विशेष नव्हतं, असं आपनं स्पष्ट केलं होतं. दुसरीकडे आम आदमी पक्षात फूट पडेल असं वृत्त होतं. त्यामुळं ही बैठक बोलावण्यात आली होती, असा दावा करण्यात येत आहे.

आम आदमी पक्षाला दिल्ली विधानसभा निवडणुकीत पराभवाला सामोरं जावं लागलं होतं. दशकांपेक्षा अधिक काळ सत्तेत असलेल्या आम आदमी पक्षाला धूळ चारून भाजपनं ४८ जागांवर विजय मिळवला होता. तर आम आदमी पक्षाला केवळ २२ जागांवरच विजय मिळवता आला होता. काँग्रेसला दिल्लीत एकही जागा जिंकता आली नाही. पण आपच्या पराभवानं काँग्रेसला पंजाबमध्ये नवी ऊर्जा मिळाल्याचं बोललं जात आहे.

पंजाबमध्ये अरविंद केजरीवाल यांना मुख्यमंत्री व्हायचं आहे, असा दावा काँग्रेस आणि भाजपने अलीकडेच केला होता. पंजाबमध्ये पोटनिवडणूक लढून त्यांना मुख्यमंत्रिपदी विराजमान व्हायचं आहे, असा दावा केला जात असला तरी, आम आदमी पक्ष आणि तेथील नेत्यांनी हा दावा खोडून काढला आहे.