पाटणा : भारतात असंख्य चहाप्रेमी आहेत. चहासाठी (Tea addiction) लोक काहीही करायला तयार होतात. अशीच एक घटना बिहारमध्ये घडली आहे. आवडता चहा पिण्यासाठी ट्रेनच्या लोको पायलटने (Train loco pilot) चक्क ट्रेनच थांबवल्याची घटना सिवानमध्ये (siwan) घडली आहे. यावेळी लोको पायलटने चहाचा आनंद घेतला खरा, पण त्याच्यामुळे शेकडो प्रवाशांना अडचणीचा सामना करावा लागला.

मिळालेल्या माहितीनुसार, 11123 क्रमांकाची डाउन झांसी एक्सप्रेसच्या लोको पायलटने सिसवन ढालावर ट्रेन थांबवली. यावेळी दोन्ही बाजूचे फाटक बंद होते. त्यामुळे एकीकडे ट्रेनमधील प्रवाशांना ताटकळत वाट पाहावी लागली आणि दुसरीकडे रस्त्यावर थांबलेल्या लोकांमुळे मोठ्या प्रमाणावर वाहतूक विस्कळीत झाली. काहीवेळानंतर गार्ड चहा घेऊन आला, तेव्हाच फाटक उघडले गेले.

रुग्णवाहिका ट्रॅफिक जाममध्ये अडकली

ट्रेन जात असताना सिसवन ढाला येथेही ट्रॅफिक जाम झाला होता. दोन्ही बाजूला वाहनांच्या लांबच लांब रांगा लागल्या होत्या. सिसवनच्या बाजूने रुग्णवाहिकेतून रुग्णाला उपचारासाठी नातेवाईक घेऊन येत होते, मात्र फाटक बंद असल्याने रुग्णवाहिका ट्रॅफिक जाममध्ये अडकली. याप्रकरणी स्टेशन अधीक्षक अनंत कुमार यांनी माहिती घेऊन कारवाई करण्याचे निर्देश दिले आहेत.