नवी दिल्ली : पाकिस्तानच्या अर्थव्यवस्थेवर दिवसेंदिवस ताण वाढू लागला आहे. या शेजारी देशात महागाई प्रचंड वाढली आहे. पाकिस्तानातील नागरिकांना जीवनाश्यक वस्तू खरेदी करण्यासाठीही अधिकची किंमत मोजावी लागत आहे. पाकिस्तानी सरकारला कर्ज फेडण्यासाठी दुसऱ्या देशाकडून कर्ज घ्यावे लागत आहे. दुसरीकडे या देशातील एका भिकारी व्यक्तीची जोरदार चर्चा होत आहे. या भिकारी व्यक्तीची संपत्ती जाणून डोळे फिरतील.

मुलांसाठी खरेदी १ कोटींचा विमा

पाकिस्तानातील या श्रीमंत भिकारीची संपत्ती लाखोंमध्ये आहे. या भिकाऱ्याची मुले चांगल्या शाळेत शिक्षण घेतात. याने मुलांसाठी एक कोटींचा विमा देखील खरेदी केला आहे. फेडरल बोर्ड ऑफ रेव्हेन्यूने या श्रीमंत भिकाऱ्याची संपत्तीची माहिती प्रसिद्ध केली होती.

भिकारी दिवसाला कमावतो १ हजार रुपये

पाकिस्तानी माध्यमांनी दिलेल्या माहितीनुसार, पाकिस्तानच्या या भिकाऱ्याचं नाव शौकत आहे. पाकिस्तानच्या पंजाब प्रांतातील मुल्तान शहरात राहतो. पाकिस्तानच्या सर्वोच्च टॅक्स कलेक्शन संस्था फेडरल बोर्ड ऑफ रेव्हेन्यूच्या माहितीनुसार, ऑक्टोबर २०२१ मध्ये शौकत भिकारी व्यक्तीच्या बँक खात्यात १७ लाख रुपये खात्यात होते. शौकत भीक मागून दिवसाला १००० रुपयांची कमाई करतो.

महागड्या शाळेत शिक्षण घेतात भिकाऱ्याचे मुले

शौकत मुल्तानमधील श्रीमंत भिकारी आहे. त्याचे मुलं मुल्तान शहरातील सर्वात महागड्या शाळेत जातात. शौकतने मुलांसाठी १ कोटींचा विमा खरेदी केला आहे. शौकतने अनेकदा सोशल मीडियावर त्याच्या संपत्तीविषयी माहिती दिली आहे.

दरम्यान, मीडिया रिपोर्टनुसार, पाकिस्तानी भिकारी पासपोर्ट घेऊन सौदीला पोहोचतात. तिथे जाऊन मशिदीच्या बाहेर भीक मागतात. या भिकाऱ्यांना सौदीतील स्थानिक लोक मोठ्या प्रमाणात भीक देतात.