महाराष्ट्राच्या शेजारील राज्यात म्हणजेच कर्नाटकात मोठी राजकीय उलथापालथ होणार आहे. राज्याचे मुख्यमंत्री सिद्धरामय्या आपल्या पदाचा राजीनामा देणार असल्याची चर्चा होती. त्यानंतर उपमुख्यमंत्री डीके शिवकुमार हे मुख्यमंत्री होतील, परंतु राज्यपाल हेच ऑऊट ऑफ टाऊन असल्यानं राजीनाम्याचा विषय रखडला आहे. (siddaramaiah May Quit, But Governor’s Unavailability Delays Power Shift)

दरम्यान सिद्धरामय्या आपल्या पदाचा राजीनामा देऊ शकतात अशी अटकळ आहे. मात्र, त्यांनी अद्याप तसे अधिकृतपणे जाहीर केलेले नाहीये. दरम्यान, राज्यपाल थावरचंद गेहलोत राजधानी बेंगळूरूमध्ये नसल्याचे वृत्त आहे. त्यामुळे सिद्धरामय्या आणि राज्यपाल यांची भेट होण्याची शक्यता वाटत नाहीये. दरम्यान सिद्धरामय्या यांनी राजीनामा दिल्यानंतर डी. के. शिवकुमार यांना मुख्यमंत्रीपदाची ऑफर दिली जाऊ शकते, असे मानले जात आहे. मात्र, काँग्रेस पक्षाने अद्याप याची घोषणा केलेली नाही.

राज्यपाल गेले कुठे?

इंडिया टुडेच्या वृत्तानुसार, गेहलोत सध्या बंगळूरुमध्ये नाहीत. मिळालेल्या माहितीनुसार, राज्यपाल बुधवारी रात्री ११:३० वाजता मुंबईसाठी रवाना झाले. यामागे कौटुंबिक कारणासाठी ते मुंबईला गेल्याचं सांगितलं जात आहे. मात्र, त्यांनी आपल्या प्रवासाचे कारण सार्वजनिकरित्या उघड केलेले नाही. असे म्हटले जात आहे की, त्यांच्या परतीच्या विमानाचे तिकीट अद्याप बुक झालेले नाही.

राज्यपाल नाहीत, मग पुढे काय होणार?

सूत्रांचा हवाला देत अहवालात म्हटले आहे की, सिद्धरामय्या राज्यपालांच्या कार्यालयात आपला राजीनामा सादर करणार आहेत. यापूर्वीच्या अटकळांनुसार, सिद्धरामय्या सकाळी ११ वाजता आपला राजीनामा सादर करून राज्यपालांना भेटतील असं म्हटले जात होते. विशेष म्हणजे, त्यांनी गुरुवारी आमदारांची बैठक बोलावली आहे. राजकीय तर्कांमध्ये अंतर्गत समन्वय मजबूत करण्याचा हा एक महत्त्वपूर्ण प्रयत्न म्हणून या बैठकीकडे पाहिले जातंय. या घडामोडीला आणखी गती देत, उपमुख्यमंत्री शिवकुमार यांनी दिल्लीतील आपला मुक्काम वाढवला आहे. ते आता गुरुवारी सकाळी बेंगळूरुला परतणार आहेत.