लग्न झाल्यानंतर पहिल्याच रात्री नवरीची कौमार्य चाचणी करण्यात आलीय. तसेच महिलेचा सासरच्या मंडळींकडून जाच आणि हुंड्यासाठी छळ करण्यात आला आहे. कौमार्य चाचणी आणि हुंड्यासाठी छळ करण्यात आल्यामुळे महिलेला मानसिक आणि शारीरिक त्रास सहन करावा लागला होता. ही धक्कादायक घटना इंदूरच्या बाणगंगा परिसरात घडली असून, याच त्रासाला कंटाळून तिने आता दंड थोपटले आहेत. पीडितेच्या तक्रारीवरून बाणगंगा पोलीस ठाण्यात सासरच्या मंडळींविरूद्ध विविध कलमांतर्गत गुन्हा दाखल करण्यात आला आहे.

पीडित महिलेचा डिसेंबर २०१९ ला भोपाळ येथील तरूणाशी लग्न जुळले. मात्र, लग्नाच्या पहिल्याच रात्री तिला मानसिक धक्का बसला. तिची लग्नाच्या पहिल्याच रात्री कौमार्य चाचणी करण्यात आली होती. यासंदर्भात वकील के.के कुन्हारे यांनी सांगितले की, ही प्रथा काही समाजात प्रचलित आहे. मात्र, २१ व्या शतकात ती अंगीकारणे अत्यंत लाजिरवाणे असल्याचं त्यांनी सांगितलं. यामुळे बहुतांश तरूणीला मानसिक आणि शारीरिक त्रासाला सहन करावे लागते.

हुंड्यासाठीही केला छळ

कौमार्य चाचणी व्यतिरिक्त तरूणीचा हुंड्यासाठीही छळ करण्यात आला आहे. तसेच गर्भधारणेदरम्यान, तरूणीला ३ महिन्यात गर्भपात आणि नंतर मृत मुलीला जन्म देणं यामुळे तरूणीला शारीरिक त्रास सहन करावा लागला. सध्या पीडित तरूणी एका मुलीची आई आहे.

महिला आणि बालविकास विभागाच्या तपास अहवालात लग्नाच्या पहिल्याच रात्री सासरच्या लोकांनी अमानुष पद्धतीने तरूणीचे कौमार्य तपासले. अयोग्य पद्धतीने तरूणीची कौमार्य चाचणी केली. या चाचणीमुळे पीडितेला मानसिक आणि शारीरिक छळाला सामना करावा लागला आहे.

सासरच्या मंडळींवर कारवाई करण्याचे आदेश

या प्रकरणाचे गांभीर्य लक्षात घेत न्यायालयाने सासरच्या मंडळींवर कारवाई करण्याचे आदेश दिले आहेत. वकील के.के कुंहारे म्हणाले, अशा प्रथा समाजातील महिलांच्या हक्कांच्या विरोधात आहेत. आताही महिला या घटनांविरोधात आवाज उठवत आहेत, याप्रकरणावरून सिद्ध होते.'