इंडोनेशियामध्ये एका जहाजाला मोठी आग लागल्याची घटना घडलीय. आग लागल्यानंतर जीव वाचवण्यासाठी प्रवाशी सैरवैर पळू लागले, त्यामुळे मोठा गोंधळ उडाला. लोकांनी स्वतःला वाचवण्यासाठी समुद्रात उड्या मारल्या. ही घटना उत्तर सुलावेसीमधील तालिस बेटाजवळील केएम बार्सिलोना व्हीए येथे घडल्याचे वृत्त आहे.

या घटनेचा व्हिडिओ सोशल मीडियावर व्हायरल झालाय. जहाजावर २८० हून अधिक लोक होते असे सांगण्यात येत आहे. भीषण आगीमुळे प्रवासी घाबरलेले दिसत होते. जहाजात मुलेही होती. काही जण आगीपासून वाचण्यासाठी समुद्रात उड्या मारताना दिसत होते. या घटनेनंतर समुद्रात शोध मोहीम राबवण्यात येत आहे. समुद्रात उड्या मारलेल्या लोकांना वाचवण्याचे प्रयत्न सुरू आहेत.

दरम्यान जहाजाला आग का कशामुळे लागली याचे कारण अद्याप समजू शकलेले नाहीये. शोध आणि बचाव कार्यालयाचे प्रमुख जॉर्ज लिओ मर्सी रांडांग म्हणाले की, ही घटना उत्तर मिनाहासा तालिसे येथे घडली. अडकलेल्या लोकांना वाचवण्यासाठी आणि बाहेर काढण्याचे काम पथकांकडून केले जात आहे. मदतीसाठी टो आणि बचाव जहाजे तसेच मच्छिमारांना पाचारण करण्यात आले. जवळच्या जहाजांनीही मदतीला धाव घेतली.

या आगीचे अनेक व्हिडिओ सोशल मीडियावर व्हायरल होत आहेत. आग इतकी भीषण होती की काही वेळातच संपूर्ण जहाज जवळजवळ जळून खाक झाले.