IND vs China Latest News : अरुणाचल प्रदेशातील तवांग जिल्ह्यात प्रत्यक्ष नियंत्रण रेषेवर (LAC) भारतीय लष्कराचे जवान आणि चिनी सैन्यांमध्ये झटापट झाली. या झटापटीत दोन्ही बाजूंचे अनेक सैनिक जखमी झाल्याची माहिती आहे. ही घटना ९ डिसेंबरची आहे. लष्कराच्या सूत्रांनी दिलेल्या माहितीनुसार, या चकमकीत भारतीय लष्कराचे किमान 20 जवान जखमी झाले आहेत. त्याचबरोबर चिनी सैन्याचेही मोठे नुकसान झाले आहे.  (Latest Marathi News)

जखमींवर गुवाहाटी येथील सैनिक (India China) रुग्णालयात उपचार सुरू आहेत. भारताचा एकही जवान गंभीर नसला तरी या झटापटीतनंतर शांतता प्रस्थापित करण्यासाठी भारताच्या कमांडर्सनी चीनच्या कमांडरसोबत फ्लॅग मीटिंग केल्याचं सूत्रांनी सांगितलं आहे.

एका हिंदी वृत्तवाहिनेने दिलेल्या माहितीनुसार, 9 डिसेंबरच्या रात्री तवांगमध्ये चिनी सैनिक प्रत्यक्ष नियंत्रण रेषेजवळ पोहचले होते. यावेळी चीनचे जवळपास 600 हून अधिक सैनिक होते. चीनचे सैन्य समोर आल्यानंतर भारतीय जवानांनी सुद्धा त्यांना चोख प्रत्युत्तर दिलं. चीनचे सैन्य संपूर्ण तयारीनिशी आले होते. मात्र, त्यांना भारतीय जवानांनी केलेल्या तयारीची कल्पना नव्हती.

सूत्रांनी दिलेल्या माहितीनुसार, दोन्ही देशांमधील सैन्यांमध्ये जोरदार झटापट झाली. भारतीय लष्कराने चिनच्या 600 जवानांना चोख प्रत्त्युतर दिलं. या झटापटीत दोन्ही बाजूंचे अनेक सैनिक जखमी झाले. जखमी चिनी सैनिकांची संख्या भारतीय सैनिकांपेक्षा कितीतरी पटीने जास्त आहे. या चकमकीत 20 भारतीय जवान जखमी झाल्याचे समोर आले असून त्यांना उपचारासाठी गुवाहाटी येथे आणण्यात आले आहे.

खरेतर, अरुणाचल प्रदेशातील तवांग सेक्टरमधील एलएसीजवळील काही भागांवर भारत आणि चीन दोन्हीही दावा करतात. अशा स्थितीत 2006 पासून अशी प्रकरणे वारंवार समोर येत आहेत. दरम्यान, दोन्ही देशांच्या सैन्यामध्ये 15 जून 2020 च्या घटनेनंतर अशा प्रकारची ही पहिलीच घटना आहे. यापूर्वी लडाखच्या गलवान खोऱ्यात चिनी सैनिकांशी झालेल्या हिंसक झटापटीत 20 भारतीय जवान शहीद झाले होते आणि अनेक जण जखमी झाले होते. या झटापटीत चीनचेही शेकडो सैनिक मारले गेले होते.

Edited By - Satish Daud