नागालँडमधील सुखोवी परिसराजवळ आसाम रायफल्सच्या वाहनावर संशयित IED '(इम्प्रोव्हाइज्ड एक्सप्लोझिव्ह डिव्हाइस') चा स्फोट झालाय. प्राथमिक माहितीनुसार या स्फोटात एक जवान शहीद झाला असून अन्य चार जण जखमी झालेत. सुरक्षा दलांनी संपूर्ण परिसर वेढला असून शोधमोहीम सुरू आहे. जखमी जवानांना तातडीने जवळच्या लष्करी रुग्णालयात दाखल करण्यात आले आहे. या भ्याड हल्ल्यामागे कोणती दहशतवादी संघटना आहे, याबाबत अद्याप कोणतीही अधिकृत पुष्टी झालेली नाहीये.

हा स्फोटाची ही घटना चुमौकेदिमा भागात घडली. आसाम रायफल्सच्या ताफ्याजवळ आयईडी (IED) स्फोट झाल्याची गेल्या आठवड्यातील ही दुसरी घटना आहे. या घटनेनंतर संपूर्ण परिसरात सुरक्षा व्यवस्था कडक करण्यात आली आहे. मोठ्या प्रमाणावर शोधमोहीम राबवली जातेय. घटनास्थळी अतिरिक्त सुरक्षा दलांची तुकडी तैनात करण्यात आलीय. तर सुखोवी आणि आसपासच्या जंगलात हल्लेखोरांचा शोध घेतला जातोय. सुखोवी हे नागालँडच्या दीमापूर जिल्ह्यात असून ते एक केंद्रस्थान आहे.

एका आठवड्यात घडलेली ही दुसरी घटना आहे. ६ जुलै रोजी मणिपूरच्या उखरुल जिल्ह्यात संशयित दहशतवाद्यांनी एका ताफ्यावर अचानक हल्ला केला. या हल्ल्यात आसाम रायफल्सच्या ४० व्या बटालियनचे दोन जवान शहीद झाले. शहीद झालेल्या जवानांची ओळख वॉरंट ऑफिसर बलवंत सिंग आणि रायफलमॅन सी.एम. सिंग अशी पटली होती.