Helicopter Crash Viral Video : सोशल मीडियावर एक हेलिकॉप्टर कॅशचा व्हिडीओ व्हायरल होत आहे. हे हेलिकॉप्टर टेकऑफनंतर काही वेळातच खाली कोसळले. या अपघातामध्ये पाच जण जखमी झाल्याची माहिती समोर आली आहे. ही घटना अमेरिकेच्या कॅलिफोर्नियामधील हंटिंग्टन स्ट्रीटच्या चौकात घडल्याची माहिती समोर आली आहे.

मिळालेल्या माहितीनुसार, कॅलिफोर्नियातील हंटिंग्टन स्ट्रीट आणि पॅसिफिक कोस्ट हायवेजवळ काल शनिवारी (११ ऑक्टोबर) स्थानिक वेळेनुसार दुपारी दोनच्या सुमारास हेलिकॉप्टरचा अपघात झाला. अपघाताच्या वेळी हेलिकॉप्टरमध्ये दोन जण होते. हे दोन जण आणि रस्त्यावरचे तिघेजण दुर्घटनेमध्ये जखमी झाले. सर्वांना उपचारांसाठी रुग्णालयात दाखल करण्यात आले आहे.

कॅलिफोर्नियातील हेलिकॉप्टर क्रॅशचा व्हिडीओ सोशल मीडियावर वेगाने व्हायरल होत असल्याचे पाहायला मिळत आहे. हेलिकॉप्टर कमी उंचीवर उडत असताना त्याचे पंख एका ताडाच्या झाडावर आदळतात. तेव्हा हेलिकॉप्टरचे नियंत्रण सुटते. सुरुवातीला हेलिकॉप्टर फिरत राहते आणि नंतर खाली कोसळले, असे व्हिडीओमध्ये दिसते.

अपघातग्रस्त झालेले हेलिकॉप्टर एअरलाईन क्षेत्रातील दिग्गज एरिक निक्सन चालवत होते असे म्हटले जात आहे. १९८० बेल २२२ (टेल नंबर N222EX) हेलिकॉप्टर असे अपघातग्रस्त झालेल्या हेलिकॉप्टरचे नाव आहे. या घटनेची माहिती मिळताच अधिकारी घटनास्थळी दाखल झाले. त्यांनी हेलिकॉप्टरमधील दोघांना बाहेर काढले आणि सर्व जखमींना रुग्णालयात नेले.