बाप लेकीच्या नात्याला काळीमा फासणारी घटना समोर येत आहे. एका नराधम बापाने आपल्याच ७ वर्षीय मुलीवर लैंगिक अत्याचार केला आहे. नंतर तिची गळा दाबून निर्घुण हत्या केली. आपलं पितळ उघड पडू नये म्हणून त्याने शेजारच्या व्यक्तीला अडकवण्याचा प्रयत्न केला. मात्र, शवविच्छेदन अहवालामुळे संपूर्ण प्रकरण समोर आलं.

दिल्लीतील गाझियाबाद लोणी परिसरात ही संतापजनक घटना घडली. ज्ञान सिंग असे आरोपीचे नाव आहे. या घटनेसंदर्भात सहाय्यक पोलिस आयुक्त अजय कुमार सिंह म्हणाले, शेजारी शांती देवी यांच्या घरी त्यांच्या कुटुंबाने एक पदार्थ खाल्ला होता. ज्यामुळे पत्नीसह ५ मुलेही आजारी पडली होती. आरोपीच्या तक्रारीनंतर पोलिसांनी शांती देवीविरुद्ध तक्रार दाखल केली.

त्यानंतर चिमुकलीला रुग्णालयात नेण्यात आले. त्याठिकाणी डॉक्टरांनी तिला मृत घोषित केले. उपचारानंतर, तिच्या उर्वरित पाच मुलांना रुग्णालयातून सोडण्यात आले. आरोपीने त्याच्या मुलीच्या शवविच्छेदनासाठी परवानगी देण्यास नकार दिला होता.

पोलिसांना संशय आल्यानं त्यांनी शवविच्छेदनासाठी मृतदेह दुसऱ्या रुग्णालयात नेले. शवविच्छेदनाचा अहवाल समोर आल्यानंतर हे प्रकरण उघडकीस आलं. पोस्टमॉर्टम रिपोर्टमध्ये लैंगिक अत्याचार आणि गळा दाबून हत्या केल्याचे सिद्ध झाले. यानंतर, सोमवारी लोणी पोलिसांनी आरोपी ज्ञान सिंगला ताब्यात घेत अटकही केली आहे. त्याच्याविरुद्ध भारतीय दंड संहितेच्या संबंधित कलमांखाली गुन्हा दाखल करण्यात आला आहे.