दिल्ली - आझाद मार्केट परिसरात बांधकाम सुरू असलेली चार मजली इमारत कोसळली (Building Collapse) आहे. या घटनेत ढिगाऱ्याखाली दबून 3 मजुरांचा मृत्यू झाला आहे, तर 6-7 मजूर ढिगाऱ्याखाली अडकल्याची भीती व्यक्त केली जात आहे. घटनेची माहिती मिळताच बचाव पथक घटनास्थळी दाखल झाले.

आझाद मार्केट परिसरातील शीश महालमधील इमारतीत बांधकाम सुरू होते. ती इमारत अचानक कोसळल्याने परिसरात एकच खळबळ उडाली. या घटनेत आतापर्यंत 3 मजुरांचा मृत्यू झाला असून मृतांचा आकडा वाढण्याची शक्यता वर्तवण्यात येत आहे. सकाळी 8.30 च्या सुमारास ही घटना घडल्याची माहिती समोर येत आहे. यानंतर तातडीने बचाव पथक घटनास्थळी दाखल झाले.

हे देखील पाहा -

बचाव पथकासोबत स्थानिक लोकही मदत आणि बचाव कार्यात गुंतले आहेत. सध्या ढिगारा हटवण्याचे काम सुरु आहे. यामध्ये अनेक लोक अडकल्याची भीती व्यक्त होत असली तरी नेमका आकडा कोणालाच माहीत नाही, असे तेथे उपस्थित लोकांचे म्हणणे आहे.

बचाव पथकाच्या अधिकाऱ्यांनी दिलेल्या माहितीनुसार, इमारत कोसळल्याची माहिती सकाळी 8.30 च्या सुमारास मिळाली. शीश महल परिसरात घर क्रमांक 754 पडल्याचे सांगण्यात आले. त्यानंतर अग्निशमन दलाच्या चार गाड्या घटनास्थळी पाठवण्यात आल्या आहेत. मदत आणि बचाव कार्य सुरू आहे. जवळपास 6-7 मजूर ढिगाऱ्याखाली अडकल्याची शक्यता आहे.