Diamond News : शेतामध्ये काम करत असताना एका शेतकऱ्याला मौल्यवान हिरा सापडल्याची घटना मध्यप्रदेशमध्ये घडली आहे. ४.२४ कॅरेटच्या हिऱ्याची किंमत तब्बल २० लाख रुपये असल्याचे म्हटले जात आहे. शेतकऱ्याने हिरा कार्यालयामध्ये हा हिरा जमा केला आहे. लवकरच या हिऱ्यावर बोली लागणार असल्याची माहिती समोर आली आहे.

मिळालेल्या माहितीनुसार, मध्यप्रदेशनच्या पन्ना जिल्ह्यामध्ये ठाकूर प्रसाद या शेतकऱ्याला शेतामध्ये काम करत असताना ४ कॅरेट २४ सेंटचा चकचकीत हिरा सापडला. ते मागील अनेक वर्षांपासून शेतामध्ये काम करत आहेत. अथक प्रयत्नांनंतर यश मिळाले असल्याचे ठाकूर प्रसाद यांनी म्हटले आहे. हिऱ्याच्या मोबदल्यामध्ये मिळणाऱ्या पैशातून कुटुंबाची आर्थिक स्थिती सुधारुन नवीन काम सुरु करण्याचा त्यांनी निर्धार केला आहे.

हीरा पारखी अनुपम सिंह यांनी या प्रकरणाची माहिती दिली आहे. ठाकूर प्रसाद यांना मिळालेल्या हिरा सरकोहा क्षेत्रात मिळाला आहे. या हिऱ्याची लवकरच बोली लागणार आहे. पन्ना जिल्ह्यामध्ये या आधीही अनेक शेतकऱ्यांना हिरे मिळाले आहेत. या जमिनीमध्ये हिरे असल्याचेही अनुपम सिंह यांनी सांगितले.

मध्यप्रदेशच्या पन्ना जिल्ह्याला हिऱ्याच्या असंख्य खाणी आहेत. या भूमीवर हिरे सापडत असल्याने येथील लोक रातोरात श्रीमंत झाल्याच्या घटना घडल्या आहेत. मागच्या वर्षी एका शेतकऱ्याला असाच हिरा मिळाला होता. त्या हिऱ्याची बाजारामध्ये बोली लावण्यात आली. तेव्हा बोलीमार्फत हिरा तब्बल ५ कोटी रुपयांना विकला गेला होता.