तुम्ही जर अंड खात असाल तर ही बातमी तुमच्यासाठी महत्वाची आहे..कारण तुम्ही खात असलेल्या अंडयाची एक्सपायरी डेट उलटून गेलीय असं तुम्हाला सांगितलं तर... होय तुम्ही खात असलेल्या अंड्यांवर आता एक्स्पायरी डेट लिहून येणार आहे. उत्तर प्रदेश सरकारनं व्यापारी-शेतकऱ्यांसाठी एक महत्त्वपूर्ण निर्णय घेतलाय. एकीकडे, आधीच इराण-अमेरिका युद्धामुळं 1 कोटी अंड्यांची निर्यात बंद झाली असतानाच दुसरीकडे सरकारनं यासंदर्भात नवे नियम जाहीर केलेत.

ग्राहकांना खराब अंडी विकण्यापासून रोखण्यासाठी नियमावली

प्रत्येक अंड्यांवर ले डेट आणि एक्सपायरी डेट बंधनकारक

नियम मोडणाऱ्या दुकानदारांचा माल जप्त होणार

या नव्या नियमांची अंमलबजावणी 01 एप्रिलपासून होणार आहे. उत्तर प्रदेशात कोणत्याही दुकानदाराला किंवा व्यापाऱ्याला तारीख नसलेली अंडी विकता येणार नाहीयेत. मुदतीची नोंद बंधनकारक करण्यात आली आहे. यामुळे अंडे किती जुने आणि ते खाण्यासाठी योग्य आहे का, हे ग्राहकांना स्वतः तपासून घेता येणारेय. मात्र, असं जरी असलं तरी सर्वसामान्यपणे अंडे किती काळ टिकतात पाहूयात...

तज्ज्ञांच्या मते, सामान्य तापमानात म्हणजेच 30 अंश सेल्सियसमध्ये अंडी केवळ 2 आठवड्यांपर्यंत चांगली राहू शकतात. तर 02 ते 08 अंश सेल्सियस तापमानात म्हणजेच फ्रीजमध्ये ठेवल्यास महिन्याभरापर्यंत अंडी टिकू शकतात.आतापर्यंत आपण औषधं, बिस्किटं किंवा दुधाच्या पिशवीवर किंवा आणखी काही खाण्याच्या पदार्थांवर एक्सपायरी डेट बघायचो. पण आता उत्तर प्रदेश सरकारने घेतलेल्या या निर्णयामुळे ग्राहकांना पहिल्यांदाच चक्क अंड्यांवर एक्स्पायरी डेट पाहायला मिळणारेय. खरं तर 'संडे हो या मंडे, रोज खाओ अंडे' असं म्हटलं जातं. कारण भरपूर प्रोटीन म्हणजेच प्रथिने असलेले अंड खाणे प्रकृतीसाठी चांगलं मानलं जातं. मात्र आता खरेदी केलेल्या अंड्यावरची पहिली तारीख बघा आणि मग खूशाल खा..