उत्तर प्रदेशच्या ग्रेटर नोएडामधून धक्कादायक घटना समोर आली आहे. रबूपुरा पोलीस स्टेशनच्या हद्दीत एका खासगी कंपनीच्या सफाई कर्मचाऱ्यांच्या दारू पार्टीत भयंकर प्रकार घडला. सफाई कर्मचाऱ्यांनी पार्टीत प्रायव्हेट पार्टमध्ये कंप्रेसर पाइप टाकून हवा भरल्याची घटना घडली आहे. हवेच्या उच्च दाबामुळे तरुणाची तब्येत बिघडली. त्यानंतर त्याला तातडीने रुग्णालयात दाखल करण्यात आलं आहे.

टीव्ही९ रिपोर्टनुसार, ग्रेटर नोएडा येथील 'सूर्य ग्लोबल फ्लेक्सी फिल्म' नावाच्या कंपनीत उत्तरांखडच्या काशीपूरमध्ये राहणारे तिघे सफाई कर्मचारी काम करत होते. या तिघांनी दारू पार्टीचं आयोजन केलं होतं. या पार्टीदरम्यान झालेला कचरा एक कर्मचारी वाकून सफाई करत होता. त्याचवेळी दोन सफाई कर्मचाऱ्यांनी मस्करीत त्याच्या प्रायव्हेट पार्टमध्ये कंप्रेसर पाइपने हवा भरली.

उच्च दाबामुळे पीडित कर्मचाऱ्याच्या पोटात हवा गेली. त्यामुळे त्याची तब्येत बिघडली. काही वेळानंतर त्याची तब्येत बिघडल्यानंतर त्याला तातडीने रुग्णालयात दाखल केले. जखमी कर्मचाऱ्याला आधी कैलाश रुग्णालयात दाखल केले. प्राथमिक उपचार केल्यानंतर त्याच्या पोटातील आतड्या फाटल्याचे समोर आलं. त्यामुळे पुढील शस्त्रक्रियेसाठी ग्रेटर नोएडाच्या यथार्थ रुग्णालयात दाखल केलं. पीडित कर्मचारी सध्या ICU मध्ये असून त्याच्यावर उपचार सुरू आहेत.

समीर असे जखमी कर्मचाऱ्याचे नाव आहे. या प्रकरणाची माहिती मिळताच पोलिसांनी घटनास्थळी धाव घेत तपास सुरू केला. पोलिसांनी कर्मचाऱ्यांनी दोन्ही सहकारी जीशान, दिलशाद यांना अटक केली. रबूपुरा पोलीस स्टेशनचे प्रभारी यांनी घटनेची माहिती मिळताच तात्काळ कारवाईला सुरूवात केली आहे. कंपनीच्या मॅनेजरच्या जबानीवरून पोलिसांनी दोघांच्या विरोधात गुन्हा दाखल केला आहे. पोलिसांनी दोघांनाही ताब्यात घेतलं आहे.