Delhi News : 26 जानेवारी म्हणजेच प्रजासत्ताक दिनापूर्वी दिल्ली पोलिसांनी दहशतवाद्यांचा मोठा कट उधळून लावला आहे. याप्रकरणी दोन संशयीतांना दिल्ली पोलिसांनी ताब्यात घेतलं आहे. नौशाद आणि जगजीत सिंह असे या संशयीतांची नावे आहे. प्रजासत्ताक दिनाच्या पार्श्वभूमीवर दिल्लीत घातपात घडवून आणण्याचा कारस्थानाला प्रत्यक्ष रूप देण्यासाठी हे दोघे कार्यरत होते.

पोलिसांनी या संशयीत आरोपींना गुरुवारी ताब्यात घेतलं असून न्यायालयाने या दोनही आरोपींना शुक्रवारी 14 दिवसांची पोलिस कोठडी सुनावली आहे. या संशयीत दहशतवाद्यांची चौकशी केल्यानंतर यांच्या घरी पोलिसांनी टाकलेल्या रेडमध्ये पोलिसांना (Police) 3 पिस्तुल, हॅन्डग्रेड आणि 22 जिवंत काडतुसं मिळाली आहे.

दिल्ली (Delhi) पोलिसांनी दिलेल्या माहितीनुसार जगजीत सिंह याचा खालिस्तानी दहशतवाद्यांशी संबंध आहे. तर दुसरा आरोपी नौशाद देखील ‘हरकल अल अन्सार’ HUA या दहशतवादी गटाशी संबंध असल्याचं पोलिसांनी म्हटलं आहे.

या दोनही आरोपींविरोधात युएपीएच्या अंतर्गत गुन्हा दाखल केला आहे. दोन संशयीत दहशतवादी व्यक्तींच्या चौकशी दरम्यान मिळालेल्या माहितीनंतर दिल्ली पोलिसांच्या स्पेशल टीमची ही मोठी कारवाई केली आहे.

नौशादला दोन खुनाच्या गुन्ह्यात जन्मठेपेची शिक्षा झाली आहे. यासोबतच स्फोटक कायदा प्रकरणात नौशाद हा गेली 10 वर्षे तुरुंगात आहे. मात्र तो तुरुंगातून कसा बाहेर आला हे अद्याप स्पष्ट झालेले नाही.