दिल्लीतील फतेहपूर बेरी भागातून दिल्ली पोलिसांवर प्राणघातक हल्ला झाल्याची घटना घडलीय. एका आरोपीला अजामीनपात्र वॉरंट अंतर्गत अटक करण्यासाठी गेलेल्या पोलिसांच्यावर पथकावर आरोपी आणि त्याच्या नातेवाईकांने हल्ला केला. या हल्ल्यात अनेक पोलीस जखमी झाले आहेत. त्यांना एम्स ट्रॉमा सेंटरमध्ये दाखल करण्यात आलंय. जखमी पोलिसांच्या जबाबाच्या आधारे पोलिसांनी आरोपी आझम आणि इतर हल्लेखोरांचा शोध सुरू केलाय.

आरोपी आझमविरुद्ध न्यायालयाने अजामीनपात्र वॉरंट जारी केलं होतं. त्यानंतर त्याला अटक करण्यासाठी दिल्ली पोलिसांचे एक पथक फतेहपूर बेरी पोलीस स्टेशन परिसरातील चंदन होला गावात पोहोचले. त्यावेळी पोलिस पथकाला पाहताच आझम आणि त्याच्या नातेवाईकांनी त्यांच्यावर हल्ला केला. यादरम्यान, आरोपींनी पोलीस पथकाचा पाठलाग करत त्यांना बेदम मारहाण केली.

या घटनेत अनेक पोलीस कर्मचारी जखमी झालेत. ज्यांना उपचारासाठी एम्स ट्रॉमा सेंटरमध्ये दाखल करण्यात आलंय. दरम्यान रुग्णालयात दाखल झालेल्या पोलिसांनी जबाब दिला असून त्यानुसार गुन्हा दाखल करण्यात आलाय. घटनेचे व्हिडिओही समोर आले आहेत, यात आरोपी पोलीस पथकावर हल्ला करताना दिसत आहेत.