दिल्लीतील दयालपूर भागात झालेल्या दंगलींशी संबंधित एका प्रकरणात दिल्लीतील न्यायालयाने आम आदमी पक्षाचे (आप) माजी नगरसेवक ताहिर हुसेन यांना दोषी ठरवण्यात आलंय. मात्र न्यायालयाने या प्रकरणातील इतर १२ आरोपींची निर्दोष मुक्तता केली. करकरडूमा न्यायालयात या प्रकरणाची सुनावणी घेणारे अतिरिक्त सत्र न्यायाधीश पुलस्त्य प्रमाचला यांनी हुसेन यांना भारतीय दंड संहितेच्या (IPC) कलम १४७ (दंगल घडवणे) आणि कलम १०९ (गुन्ह्यास चिथावणी देणे) अन्वये दोषी ठरवलंय. शिक्षेच्या कालावधीबाबतच्या युक्तिवादासाठी न्यायालयाने १६ नोव्हेंबर ही तारीख निश्चित केलीय.

ताहिर हुसेन यांची इतर आरोपांतून निर्दोष मुक्तता

या प्रकरणात ताहिर हुसेन, मोहम्मद शादाब, शाह आलम, रियासत अली, गुलफाम, रशीद, मोहम्मद रेहान, मोहम्मद आबिद, अर्शद कय्युम, इरशाद अहमद, दीपक सिंग सैनी, नवनीत आणि महक सिंग यांसह एकूण तेरा आरोपींचा समावेश होता. या आरोपींवर दंगल घडवून आणणे, घरात बळजबरीने प्रवेश करणे (हाऊसब्रेकिंग) आणि आग किंवा स्फोटक पदार्थांचा वापर करून नुकसान पोहोचवणे यांसारखे अनेक आरोप ठेवण्यात आले होते.

हुसेन यांना दंगल भडकवल्याप्रकरणी दोषी ठरवण्यात आलंय. तरी न्यायालयाने त्यांची इतर आरोपांतून निर्दोष मुक्तता केलीय. या प्रकरणातील इतर १२ आरोपींची मात्र सर्व आरोपांतून निर्दोष मुक्तता करण्यात आलीय.

२०२० मध्ये दिल्लीतील दंगल

फेब्रुवारी २०२० मध्ये ईशान्य दिल्लीत दंगल उसळली होती. यात ५३ जणांचा मृत्यू झाला, अनेकजण जखमी झाले आणि मालमत्तेचे मोठ्या प्रमाणावर नुकसान झाले. या हिंसाचारानंतर अनेक गुन्हे दाखल करण्यात आले. दंगलीशी संबंधित एका अन्य प्रकरणात, मार्च २०२३ मध्ये दिल्लीतील एका न्यायालयाने ताहिर हुसेन आणि इतर १० जणांविरुद्ध आरोप निश्चित करण्यात आलेत.