प्रियकराचे लग्न झाल्याचे कळताच प्रेयसी संतापली. तिने रागाच्या भरात त्याचं घर गाठलं. तिथे बेडरुममध्ये असलेल्या नववधूवर चाकूने सपासप वार केले. या घटनेत नववधू गंभीर जखमी झाली. तिच्यावर रुग्णालयात उपचार सुरू आहेत. एखाद्या सिनेमाच्या कथेलाही लाजवेल, अशा हा धक्कादायक प्रकार उत्तर प्रदेशातील वाराणसी शहरात घडलाय.

याप्रकरणी पोलिसांनी (Police) आरोपी तरुणीवर गुन्हा दाखल केला असून तिच्या प्रियकराला देखील ताब्यात घेतलं आहे. रोशन असं गंभीर जखमी झालेल्या नववधूचे नाव असून प्रिया असं अटक करण्यात आलेल्या आरोपी तरुणीचे नाव आहे.

पोलिसांनी दिलेल्या माहितीनुसार, आरोपी प्रिया आणि बबलू यांचे एकमेकांवर प्रेम होते. गेल्या 3 वर्षांपासून दोघेही रिलेशनशिपमध्ये (Love relationship) राहत होते. बबलू याने प्रियाला लग्नाचे वचनही दिले. मात्र, ऐनवेळी त्याने रोशन या तरुणीसोबत विवाह केला.

बबलूचा विवाह झाल्याचं कळताच प्रियाचा माथा ठणकला. तिने रागाच्या भरात किचनमधून चाकू घेऊन बबलूचे घर गाठले. तिथे उपस्थित असलेल्या वऱ्हाडी मंडळींसोबत प्रियाने वाद घातला. इतकंच नाही, तर बबलूच्या बेडरुममध्ये घुसून तिने नववधू रोशन हिच्यावर चाकूने सपासप (Crime) वार केले.

जो माझ्या आणि बबलूच्यामध्ये येईल, त्याला मी खल्लास करणार, असं म्हणत प्रियाने नववधू रोशनचा चाकूने गळाच चिरला. या घटनेत रोशन गंभीर जखमी झाली असून तिच्यावर रुग्णालयात उपचार सुरू आहेत. तिची प्रकृती चिंताजनक असल्याचं सांगितलं जातंय. याप्रकरणी पोलिसांनी आरोपी प्रिया आणि बबलूला अटक केली आहे.