Coromandel Express Train Accident : ओडिशा येथील बालासोरमध्ये शुक्रवारी संध्याकाळी तीन रेल्वेगाड्यांमध्ये भीषण अपघात झाला. या भीषण अपघातात ५० हून अधिक प्रवाशी मृत्युमुखी पडल्याची माहिती आहे. तर शेकडो प्रवासी जखमी झाले आहेत. रेल्वे रुळांवरून घसरून अपघात झालेल्या एक्स्प्रेसमधील एका प्रवाशानं अंगावर काटा आणणारा प्रसंग सांगितला. (latest Marathi News)

बहनागा रेल्वे स्थानकाजवळ दोन रेल्वेगाड्या आणि एक मालगाडी अशा तीन ट्रेनमध्ये भीषण अपघात झाला. आधी दुरांतो एक्स्प्रेस आणि मालगाडीची धडक झाली. त्यानंतर कोरोमंडल एक्स्प्रेस पाठीमागून धडकली, अशी माहिती समोर आली आहे. अपघातग्रस्त ट्रेनमधील एका प्रवाशानं यावेळी थरारक अनुभव सांगितला.

मी ट्रेनमध्ये झोपलो होतो. मोठा आवाज झाला. डोळे उघडले. डब्यातले दहा ते पंधरा प्रवासी माझ्या अंगावर येऊन पडले होते. त्या सर्वांच्या खाली मी अडकलो होतो, असे या प्रवाशाने सांगितले. माझ्या हाताला लागलं आहे. मानेला दुखापत झाली आहे. किती प्रवाशांचा मृत्यू झाला अशी विचारणा केली असता, मी जेव्हा डब्याच्या बाहेर आलो तेव्हा तेथील दृश्य भयावह होते, असे त्याने सांगितले. (Railway Accident)

अपघातानंतर या मार्गावरील सर्व ट्रेन रद्द

ओडिशामधील रेल्वे अपघातानंतर या मार्गावरील सर्व ट्रेन रद्द करण्यात आल्या आहेत. मदत आणि बचावकार्य वेगाने राबवले जात आहे. अपघाताच्या ठिकाणी स्थानिक प्रशासन कार्यरत आहे. एनडीआरएफ पथकांकडून बचावकार्य सुरू आहे.

मदतीसाठी ५० रुग्णवाहिका आहेत. जखमींचा आकडा वाढत आहे. त्यामुळे काही जखमींना बसमधून रुग्णालयात पोहोचवण्यात येत आहे, अशी माहिती ओडिशाचे मुख्य सचिव प्रदीप जेना यांनी दिली.