राष्ट्रीय राजधानी दिल्लीतील अतिशय वर्दळीच्या आणि पॉश समजल्या जाणाऱ्या कनॉट प्लेस परिसरात एक धक्कादायक हत्या प्रकरण उघडकीस आले आहे. राजीव चौक परिसरात फूड डिलिव्हरी करणाऱ्या तरुणांशी झालेल्या वादातून 36 वर्षीय व्यावसायिकाची बेदम मारहाण करण्यात आली. उपचारादरम्यान 17 दिवसांनी त्याचा मृत्यू झाला आहे.

मृत व्यावसायिकाचे नाव शिवम गुप्ता असे असून, ही घटना 3 जानेवारी रोजी घडली होती. शिवम गुप्ता आपल्या एका मित्रासोबत कनॉट प्लेसमधील एका पार्टीसाठी गेला होता. पार्टी संपल्यानंतर राजीव चौक मेट्रो स्टेशनजवळ त्याने एका फूड डिलिव्हरी कंपनीच्या कर्मचाऱ्याकडे पाणी मागितले.

याचवेळी दोघांमध्ये वाद झाला आणि वादाचे रूपांतर हिंसाचारात झाले. आरोपींनी शिवम गुप्ता यांच्या डोक्यावर हेल्मेटने वार केले तसेच लाथा मारून त्यांना गंभीर जखमी केले. जखमी अवस्थेत शिवम यांना प्रथम एलएनजेपी रुग्णालयात दाखल करण्यात आले, त्यानंतर आरएमएल रुग्णालयात हलवण्यात आले. मात्र, उपचार सुरू असतानाच 19 जानेवारी रोजी त्यांचा मृत्यू झाला.

पोलिसांनी या प्रकरणी सुरुवातीला BNS कलम 110 आणि कलम 3(5) अंतर्गत गुन्हा दाखल केला आहे. तपास पुढे जात असताना आणखी कलमे जोडली जाऊ शकतात, असे पोलिसांनी सांगितले आहे. या प्रकरणात आतापर्यंत दोन आरोपींना अटक करण्यात आली असून, घटनेत सहभागी असलेल्या इतर व्यक्तींची भूमिका तपासली जात आहे. राजधानीतील अत्यंत सुरक्षित मानल्या जाणाऱ्या परिसरात घडलेल्या या घटनेमुळे नागरिकांमध्ये तीव्र संताप व्यक्त केला जात आहे.