नवी दिल्ली : काँग्रेस अध्यक्ष आणि राज्यसभेचे विरोधी पक्ष नेते मल्लीकार्जुन खर्गे यांनी समान विचारधारा असलेल्या विरोधी पक्षाची बैठक बोलावली आहे. या बैठकीमध्ये हिंडबर्ग रिसर्च आणि अदाणीच्या कथित घोटाळ्यावर संसदेच्या संयुक्त समितीद्वारे चौकशी करण्याची मागणीवर चर्चा केली जाण्याची शक्यता व्यक्त केली जात आहे. त्यामुळं राज्यसभेत आजही अदानीच्या कथित घोटाळ्यावरुन विरोधक आक्रमक होण्याची शक्यता आहे. (Latest Marathi News)

लोकसभेत मोदी यांच्या विरोधात केलेल्या वक्तव्यावरून राहुल गांधी यांना नोटीस धाडण्यात आली आहे. राहुल गांधी यांना १५ फेब्रुवारी पर्यंत उत्तर देण्यास सांगितले. राष्ट्रपती अभिभाषणावरील चर्चेदरम्यान काँग्रेस नेते राहुल गांधी यांनी पंतप्रधान मोदींवर अदानी समूहाशी संबंध असल्याचे आरोप केला होता. राहुल गांधी यांनी केलेल्या या आरोपाचा मुद्दा पुन्हा एकदा लोकसभेत गाजण्याची शक्यता आहे.

संसदीय कार्यमंत्री प्रल्हाद जोशी यांनी राहुल गांधी (Rahul Gandhi) यांच्या विशेष अधिकारांचं उल्लंघन केलं म्हणून उत्तर मागितले आहे. त्यामुळं आज लोकसभेत कॉंग्रेस आणि भाजप यांच्यामध्ये पुन्हा एकदा संघर्ष पाहायला मिळू शकतो.

कोणतीही नोटीस न देता आणि पुरावे न देता पंतप्रधान नरेंद्र मोदी (Narendra modi) यांच्या विरोधात निराधार आरोप केले असा आक्षेप कायदामंत्री किरण रिजिजू, खासदार निशिकांत दुबे, माजी मंत्री रवीशंकर प्रसाद यांनी घेतला आहे.

संसदीय कार्यमंत्री प्रल्हाद जोशी यांनी राहुल गांधींच्या भाषणाचा संदर्भ देत लोकसभेच्या नियम 353 आणि 369 चे उल्लंघन झालं आहे, असं भाजपचं म्हणणं आहे. त्यामुळे राज्यसभेत विरोधक आणि सत्ताधाऱ्यांमध्ये जोरदार खडाजंगी पाहायला मिळण्याची शक्यता आहे.