नवी दिल्ली: कॉमनवेल्थ गेम्समध्ये देशासाठी पदक जिंकणारी कुस्तीपटू पूजा नंदल यांचा पती अजय नंदल यांचा ड्रग्जच्या अतिसेवनाने मृत्यू (Death) झाला असल्याची धक्कादायक बातमी समोर आली आहे. तसेच त्यांचे दोन सहकारी पैलवान रवी आणि सोनू हे देखील गंभीर आहेत, त्यांच्यावर खासगी रुग्णालयात उपचार सुरू आहेत. अजयच्या वडिलांनी रवी या पैलवानवर आपल्या मुलाला ड्रग्ज दिल्याचा आरोप करत पोलिसांत (Police) तक्रार दिली आहे.

पोलिसांनी (Police) दिलेल्या माहितीनुसार, महाराणी किशोरी महाविद्यालयाजवळ अजयच्या कारमध्ये तिनही पैलवानांनी मद्यपान केले होते, त्यानंतर तिघेही बेशुद्ध पडले. आजूबाजूच्या लोकांनी त्यांना पाहिल्यावर त्यांना रुग्णालयात दाखल करण्यात आले. डॉक्टरांनी अजयचा मृत्यू झाला, तर रवी आणि सोनूची प्रकृती अजूनही चिंताजनक असल्याची माहिती दिली आहे.

मृत अजय नंदल हा गढी बोहर गावचा रहिवासी असून, तो राष्ट्रीय स्तरावरील कुस्तीपटू होता. अजय हा महिला कुस्तीपटू पूजा नंदल यांचा पती होता. पूजाने इंग्लंडमध्ये झालेल्या राष्ट्रकुल क्रीडा स्पर्धेत महिलांच्या कुस्तीत ७६ किलो वजनी गटात कांस्यपदक जिंकून देशाची मान उंचावली होती.

पूजा आणि अजय यांचे दीड वर्षांपूर्वीच लग्न झाले होते. अजय हा राष्ट्रीय स्तरावरील कुस्तीपटू आहे आणि पूजा आंतरराष्ट्रीय कुस्तीपटू आहे. मृत अजय नंदल हा क्रीडा कोट्यातून सीआयएसएफमध्ये कॉन्स्टेबल म्हणून कार्यरत होता.

अजयच्या मृत्यूनंतर ही बातमी संपूर्ण गावासह राज्यात पसरली. त्यांच्या मृत्यूची बातमीने सर्वाने धक्काच बसला. अजय नंदल हा रोहतक येथील मेहेर सिंग आखाड्यात सराव करत होता.