Brij Bhushan Sharan Singh case :

भाजप खासदार ब्रिजभूषण शरण सिंह यांच्यावर महिला कुस्तीपटूंनी लैंगिक शोषणाचा आरोप केला होता. या प्रकरणी सुनावणी करताना दिल्लीच्या राऊस ॲव्हेन्यू कोर्टाने आपला निर्णय राखून ठेवलाय. न्यायालय १८ एप्रिलला तो निकाल देणार आहे. गेल्या वर्षी जूनमध्ये दिल्ली पोलिसांनी या प्रकरणी आरोपपत्र दाखल केले होते.(Latest News)

काही अल्पवयीन महिला पैलवान खेळाडूंनी ब्रिजभूषण शरण सिंह यांच्यावर लैंगिक शोषणाचे आरोप केले होते. त्यानंतर त्यांच्यावर पॉक्सो कायद्या अंतर्गत तक्रार दाखल करण्यात आली होती. त्यानंतर अल्पवयीन खेळाडूने तक्रार मागे घेतली होती. तक्रार मागे घेतल्यानंतर दिल्ली पोलिसांनी तक्रारदाराचा जबाब नोंदवून तक्रार रद्द करण्याचा अहवाल दाखल केला होता.

अल्पवयीन मुलीच्या वडिलांनी म्हटलं होतं की त्यांनी रागाच्या भरात ब्रिजभूषण शरण सिंह यांच्या विरोधात तक्रार दिली होती. त्यानंतर पोलिसांनी या प्रकरणाची क्लोजर रिपोर्ट तयार केली. तर दुसरीकडे महिला कुस्तीपटू या प्रकरणात पुरेसे पुरावे देण्यात अपयशी ठरल्या. असं दिल्ली पोलिसांनी कोर्टात ११०० ते १२०० पानांच्या आरोपपत्रात सांगितलं. यासोबतच पोलिसांनी ब्रिजभूषण शरण सिंह यांच्यावर दाखल केलेला POCSO खटला मागे घेण्यासाठी ५५० पानांचा रद्दीकरण अहवालही दाखल केला.

या प्रकरणाच्या तपासादरम्यान ब्रिजभूषण सिंह यांच्याविरोधात कोणतेही तांत्रिक पुरावे मिळाले नाहीत. तपासादरम्यान पोलिसांना कोणताही संशयास्पद फोटो, व्हिडिओ किंवा फुटेज किंवा कोणताही फॉरेन्सिक पुरावा सापडला नाही. पोलिसांनी महिला कुस्तीपटूंकडून पुरावेही मागितले होते, मात्र ते देऊ शकले नसल्याचं दिल्ली पोलिसांनी आपल्या चार्जशीटमध्ये म्हटले आहे.