देशात कोरोनाचा प्रादुर्भाव कमी झाला असताना केंद्र सरकारने (Central Government) महत्वाची घोषणा केली आहे. आता 18 वर्ष वयोगटापुढील सर्व नागरिकांना कोरोना लसीचा बुस्टर डोस (Vaccine) मिळणार आहे. येत्या 10 एप्रिलपासून हे डोस उपलब्ध होणार आहेत, असे आरोग्य मंत्रालयाकडून सांगण्यात आले आहे. 18 वर्षांवरील ज्यांनी दुसरा डोस घेतला असून 9 महिने पूर्ण झाले आहेत त्यांना बूस्टर डोस देण्यात येणार आहे. सर्व खाजगी लसीकरण केंद्रांवर बूस्टर डोस उपलब्ध असणार आहे असे केंद्रीय आरोग्य मंत्रालयाने स्पष्ट केले आहे.

देशात कोरोना संसर्गाचा वेग झपाट्याने कमी होत आहे आणि त्याच दरम्यान, त्याचा धोका पूर्णपणे दूर करण्यासाठी सरकारने हा मोठा निर्णय घेतला आहे. आरोग्य मंत्रालयाने दिलेल्या माहितीनुसार, १८ वर्षांपेक्षा जास्त वयाची कोणतीही व्यक्ती ही लस घेऊ शकते. मात्र, हा बूस्टर डोस घेणे बंधनकारक नाही. ते पूर्णपणे ऐच्छिक आहे. जर एखाद्याला बूस्टर डोस घेणे आवश्यक वाटले तर तो ते करून घेऊ शकतो असे देखील केंद्रीय आरोग्य मंत्रालयाने स्पष्ट केले आहे.

मंत्रालयाने सांगितले की, सध्या पहिला आणि दुसरा डोस सरकारी केंद्रांवर दिला जात आहे. याशिवाय या केंद्रांवर आरोग्य सेवा कर्मचारी, आघाडीचे कर्मचारी आणि ६० वर्षांपेक्षा जास्त वयाच्या लोकांनाही बूस्टर डोस दिला जात आहे. याशिवाय, जे इतर लोक बूस्टर डोस घेण्यास इच्छुक आहेत, ते देखील खाजगी लसीकरण केंद्रांना भेट देऊन लसीकरण करू शकतात.