नवी दिल्ली: भाजप (BJP) नेत्या आणि टिकटॉक स्टार सोनाली फोगाट यांच्या मृत्यू प्रकरणी महत्वाची माहिती समोर आली आहे. शवविच्छेदन अहवाल आला असून, सोनाली फोगाट यांच्या शरीरावर चार ते पाच जखमांचे घाव दिसून आले आहेत. विष देऊन हत्या केल्याची शक्यता व्यक्त करण्यात आली आहे. सोनाली फोगाट यांचे व्हिसारा चाचणीसाठी पाठवण्यात आले आहे. नमुन्यांची तपासणी केल्यानंतर सोनाली यांना विष किंवा केमिकल देण्यात आला होता की नाही, याची माहिती अहवालातून मिळणार आहे.

सोनाली फोगाट मृत्यू प्रकरणात पोलिसांनी सुखविंदर आणि सुधीर यांच्याविरोधात गुन्हा दाखल केला आहे. गोवा पोलिसांनी दोघांविरोधात हत्येचा गुन्हाही नोंदवला आहे.

सोनाली फोगाट (Sonali Phogat) यांच्या मृत्यूनंतर त्यांच्या कुटुंबीयांनी संशय व्यक्त केला होता. त्याचवेळी या प्रकरणात एक नवी माहिती समोर आली आहे. पीटीआयने अधिकाऱ्यांच्या हवाल्याने सांगितले की, सोनाली यांच्या शवविच्छेदन अहवालात त्यांच्या शरीरावर अनेक जखमांच्या खुणा आहेत. टोकदार वस्तूने केलेल्या त्या जखमा आहेत, असेही सांगण्यात येत आहे.

दुसरीकडे गोवा पोलिसांनी या प्रकरणात सोनाली यांचा पीए सुधीर सांगवान आणि त्याचा साथीदार सुखविंदर यांच्याविरोधात गुन्हा दाखल करून त्यांना ताब्यात घेतलं आहे. वरिष्ठ पोलीस (Police)अधिकाऱ्यांच्या माहितीनुसार, सोनाली फोगाट यांचा मृतदेह आज रात्रीच गोवा येथून दिल्लीला नेण्यात येईल. हिसारच्या ऋषी नगत स्थित स्मशानभूमीत सोनाली यांच्यावर अंत्यसंस्कार करण्यात येतील.