बिहारच्या राजकारणात खळबळ उडवणारी बातमी समोर आली आहे. मुख्यमंत्री नितीश कुमार यांनी आज बिहार विधान परिषदेचा राजीनामा दिला. त्यांच्याच पाठोपाठ आता भाजपचे राष्ट्रीय अध्यक्ष नितीन नवीन यांनी बिहार विधानसभेचा राजीनामा दिला. विधानसभा अध्यक्ष प्रेम कुमार यांनी त्यांचा राजीनामा स्वीकारला.

नितीन नबीन हे बिहारमधील बांकीपूर मतदारसंघाचे आमदार होते. त्यांनी ही जागा सलग पाच वेळा जिंकली होती. दोन आठवड्यांपूर्वी ते राज्यसभेवर निवडून आले होते. आता, राज्यसभेचे सदस्य झाल्यानंतर त्यांनी आपल्या विधानसभेच्या सदस्यत्वाचा राजीनामा दिला आहे.

सोशल मीडियावर एका पोस्टमध्ये नबीन यांनी म्हटले आहे की, गेली २० वर्षे त्यांनी बांकीपूरचे नेतृत्व केले , लोकांनी त्यांच्यावर जो विश्वास दाखवला आहे, त्याबद्दल ते नेहमीच कृतज्ञ राहतील, असे ते म्हणाले. तसेच, आपल्या नव्या भूमिकेतही बांकीपूर आणि बिहारच्या विकासाप्रती असलेली त्यांची कटिबद्धता कायम राहील, असेही त्यांनी नमूद केले आहे.

नितीश कुमार यांचा विधान परिषदेच्या सदस्यत्वाचा राजीनामा

जनता दल चे नेते आणि बिहारचे मुख्यमंत्री नितीश कुमार यांनीही सोमवारी बिहार विधान परिषदेच्या सदस्यत्वाचा राजीनामा दिला. नितीश कुमार हे १६ मार्च रोजी राज्यसभेवर निवडून आले होते. एक व्यक्ती एकाच वेळी दोन्ही सभागृहांचे सदस्य म्हणून काम करू शकत नाही, त्यामुळे राज्यसभेत प्रवेश केल्यानंतर विधान परिषद सोडणे आवश्यक होते.