Johnson Baby Powder : मुंबई उच्च न्यायालयाने जॉन्सन अॅंड जॉन्सन या कंपनीला मोठा दिलासा दिला आहे. कंपनीच्या बेबी पावडर उत्पादनाला आणि विक्रीला देखील मान्यता देण्यात आली आहे. यात अन्न आणि औषध प्रशासनाचा आदेश रद्द ठरवला गेला आहे. (Latest Johnson Baby Powder)

साल २०२२ च्या शेवटी अन्न आणि औषध प्रशासनाने जॉन्सन अॅंड जॉन्सन या कंपनीवर कारवाई केली होती. येवेळी कंपनीच्या बेबी पावडरच्या विक्रीवरच नाही तर उत्पादनावर देखील बंदी घालण्यात आली होती. मात्र आता न्यायालयाने कंपनीला मोठा दिलासा दिला आहे. काल न्यायालयाने आपल्या निकालात कंपनीच्या पावडर उत्पादन आणि विक्री दोन्हीसाठी परवानगी दिली आहे.

गेल्या वर्षी १५ सप्टेंबर रोजी शासनाने जॉन्सन अॅंन्ड जॉन्सन या कंपनीचा परवाना रद्द केला होता. त्यानंतर २० सप्टेंबर रोजी बेबी पावडरचा परवानाही रद्द करण्यात आला. तसेच कंपनीच्या बेबी पावडरमुळे कॅन्सर होऊ शकतो असे म्हटले होते. यामुळे कंपनीने थेट मुंबई उच्च न्यायालयात धाव घेतली होती.

मुंबई उच्च न्यायालयाने यावर काय म्हटले आहे?

कोणत्याही सौंदर्य प्रसादनाच्या कंपनीला अशा पद्धतीने परवाना रद्द करणे योग्य नाही. सौंदर्यप्रसादने बनवताना आरोग्याची काळजी घेणे महत्वाचेच आहे. मात्र जर काही छोटी चूक झाली तर थेट परवाना रद्द करणे हा एकच पर्याय आहे का? असा प्रश्न न्यायालयाने अन्न आणि औषध प्रशासनाला केला आहे. न्यायमूर्ती गौतम पटेल आणि न्यायमूर्ती एस. जी. दिघे यांच्या खंडपीठाने कंपनीचा परवाना रद्द करण्याचा आदेश हा फार कठोर होता असे मत नोंदवत अन्न आणि औषध प्रशासनाचा हा परवाना रद्द करण्याचा आदेश रद्द केला आहे.