मुंबई : जीवनशैली उंचावण्यासाठी विविध प्रकारचे शौक करणाऱ्या लोकांच्या खिशाला आता कात्री लागणार आहे. बिअर पिण्याबाबात (Drinking beer) काही लोकांना नेहमीच उत्सुकता असते. पण बिअर पिणे आता सामान्य नागरिकांना परवडणार नाहीय. वाढत्या महागाईचा ठसका (inflation) आता बिअर पिण्याऱ्यांनाही बसणार आहे. कारण बिअर पॅकिंगसाठी लागणाऱ्या कच्च्या मालाच्या किमती गगनाला भिडल्या आहेत. जवळपास २५ ते ३० टक्क्यांनी कच्च्या मालाच्या किमती वाढल्या आहेत. त्यामुळे बिअर कंपन्याही (beer price hike) आता किमती वाढण्याबाबत विचाराधीन आहेत. देशातील काही राज्यांमध्ये तर बिअरच्या किमती वाढल्याही आहेत. दरम्यान, मार्च महिन्यात वाढत्या उष्णतेमुळं बिअरच्या मागणीतही मोठी वाढ झाली आहे.

एका वेबसाईटने दिलेल्या रिपोर्टनुसार, बिअर बनवण्यासाठी लागणाऱ्या कच्च्या मालाच्या किमती तीन महिन्यांतच दुपटीने वाढल्या आहेत. याशिवाय लेबल, कार्टून आणि बॉटल क्राऊनची किंमतही २५ टक्क्यांनी वाढली आहे. ग्लास मेकर्सनेही ३० टक्क्यांनी किमती वाढवल्या आहेत. त्यामुळेच बिअर कंपन्यांपुढे किमती वाढवण्याशिवाय पर्याय नसल्याचं बोललं जात आहे.

किमती वाढवणं मजबुरी

डिवान्स मॉडर्न ब्रेव्हरिज (Devans Modern Breweries) कंपनीचे एमडी प्रेम दिवान यांनी सांगितलं की, आमच्याकडे दोनच मार्ग आहेत. एकतर बिअर बॉटलच्या किमती वाढवाव्या लागतील, नाहीतर जी सवलत दिली जाते ती बंद करावी लागेल. डिवान्स गॉडफादर, कोट्सबर्ग पिल्‍स आणि सिक्‍स फील्‍ड यांसारखे मोठे बॅंड बनवते. भारतात बिअरच्या किमतींवर राज्य सरकारचं नियंत्रण असतं. राज्य सरकारच्या महसूल विभागाला मद्य विक्रीच्या करातून मोठ्या प्रमाणावर पैसा मिळतो. B9 बेव्हरेजेसचे संस्थापक आणि सीईओ अंकुर जैन यांनी म्हटलंय की, बिअर बनवण्यासाठी ग्लास, गहू, अॅल्यूमिनियम यांसारखे जे महत्वाचे घटक आहेत त्यांच्या किमती मोठ्या प्रमाणात वाढल्या आहेत. याबाबत आम्ही खुलासा करण्याचा प्रयत्न करत आहोत.