उत्तर प्रदेश विधानसभा निवडणूक २०२७ मध्ये होणार आहे. त्याआधीच येथील रण तापलं आहे. उत्तर प्रदेशच्या राजकारणात आणखी एका आघाडीची घोषणा करण्यात आली आहे. एआयएमआयएम (AIMIM) चे असदुद्दीन ओवैसी आणि आझाद समाज पार्टी (कांशीराम) चे अध्यक्ष चंद्रशेखर आझाद यांनी सामाजिक परिवर्तन मोर्चाची घोषणा केली. सत्ताधारी भाजपला सामाजिक परिवर्तन मोर्चाच्या रुपानं बळकट पर्याय असल्याचं आझाद आणि ओवैसी यांनी सांगितलं.

ओवैसी आणि आझाद यांनी आघाडीची घोषणा केली. ही तिसरी आघाडी नसून पहिली मजबूत आघाडी आहे, असं आझाद म्हणाले. मोठ्या आघाडीत सहभागी होण्याचा प्रयत्न करण्यात आला, पण त्याला कमकुवत समजलं गेलं. आता आम्ही अपमान सहन करणार नाही. भाजपला पराभूत करण्यासाठी समाजवादी पक्ष आणि काँग्रेसनेही या मोर्चात सहभागी होण्याचे आवाहन आझाद यांनी केले.

असदुद्दीन ओवैसी यांनी चंद्रशेखर आझाद हे उत्तर प्रदेशच्या मुख्यमंत्रिपदाचा चेहरा असतील, अशी घोषणा केली. राज्यात भाजपला रोखण्यासाठी सामाजिक परिवर्तन मोर्चा हा मजबूत पर्याय असेल, असेही ते म्हणाले. आतापर्यंत त्यांच्या समाजातील लोकांचा वापर फक्त मतदार म्हणून करण्यात आला आहे, असे सांगतानाच आता ही आघाडी आणखी मजबूत करण्याचा प्रयत्न असेल, असेही त्यांनी सांगितले. सामाजिक परिवर्तन मोर्चा राज्यातील सर्वच्या सर्व जागांवर निवडणूक लढवणार असल्याची घोषणाही त्यांनी यावेळी केली.

या आघाडीची घोषणा होताच उत्तर प्रदेशच्या राजकारणात नवं समीकरण तयार होण्याची शक्यताही वाढली असल्याचे मानले जाते. आगामी विधानसभा निवडणुकीत हा मोर्चा किती प्रभावी ठरतो हे पाहणे औत्सुक्याचे ठरणार आहे.