अमेरिकेत विमान अपघातांची मालिका सुरूच आहे. अमेरिकेतून आणखी एक विमान अपघाताची बातमी समोर येत आहे. अॅरिझोना राज्यातील स्कॉट्सडेल विमानतळावर दोन खाजगी विमाने एकमेकांना आदळली आहेत. या अपघातात एका व्यक्तीचा जागीच मृत्यू झाला आहे. तर, चार जण जखमी असल्याची माहिती समोर आली आहे. तर, एक व्यक्ती विमानात अजून अडकली आहे. त्या व्यक्तीला वाचवण्यासाठी बचाव पथकाडून शर्तीचे प्रयत्न सुरू आहे.

उभ्या असलेल्या विमानाशी झाली टक्कर

प्लॅनिंग अँड आऊटरीच कोऑर्डिनेटर केली कुएस्टर यांनी दिलेल्या माहितीनुसार, स्कॉट्सडेल विमानतळावर १० फेब्रुवारीला विमानाचा भीषण अपघात घडलाय. एक बिझनेस जेट धावपट्टीवरून घसरले आणि उभ्या असलेल्या एका खासगी जेटला जाऊन आदळले. हे विमान टेक्सास येथून येत होते. त्यामध्ये ४ जण प्रवास करत होते. तर, उभ्या असलेल्या विमानात एक व्यक्ती होती.

अपघातात एकाचा मृत्यू अनेक जण जखमी

अॅरिझोनातील स्कॉट्सडेल अग्निशमन विभागाचे कॅप्टन डेव्ह फोलिओ म्हणाले, या भीषण अपघातात एकाचा घटनास्थळी मृत्यू झाला आहे. तसेच चार जण जखमी असल्याची माहिती समोर आली आहे. त्यापैकी एकाची प्रकृती चिंताजनक आहे. तर, एक व्यक्ती अजूनही विमानामध्ये अडकल्याची माहिती आहे. बचाव पथकाकडून त्याला वाचवण्यासाठी शर्तीचे प्रयत्न सुरू आहे.

सर्व उड्डाणे रद्द

हा विमानतळ फिनिक्स परिसरातून येणाऱ्या आणि जाणाऱ्या खासगी विमानांसाठी एक महत्त्वाचे केंद्र आहे. अपघातानंतर स्कॉट्सडेल विमानतळावरील धावपट्टी सध्या बंद आहे. गेल्या १० दिवसांत अमेरिकेत झालेला हा चौथा विमान अपघात आहे. या आधी झालेल्या विमान अपघातात ३७ जणांचा मृत्यू झाला होता. तर, ३१ जानेवारीला फिलाडेल्फिया येथे झालेल्या अपघातात ७ जणांचा मृत्यू झाला होता.