वृत्तसंस्था : कंदहार मधील शिया मशिदीमध्ये झालेल्या बॉम्बस्फोटामध्ये आज जवळपास ३० जण ठार झाले आहेत. तर जवळपास २० जण जखमी झाले आहेत, असे स्थानिक रुग्णालयातील सूत्रांनी सांगितले आहे. अफगाण नागरिकांना आणि विशेषत: शियांना कोणती सुरक्षा देण्यात तालिबान स्पष्टपणे अपयशी ठरलेला आहे.

अफगाणिस्तान मधील कुंदूझ या ठिकाणी शियापंथीयांच्या मशिदीमध्ये मागील आठवड्यात घडविण्यात आलेल्या बाॅम्बस्फोटामध्ये सुमारे १०० जण ठार किंवा जखमी झाले होते. या बॉम्बस्फोटाची जबाबदारी अद्याप कोणी देखील स्वीकारली नाही. या अगोदर इस्लामिक स्टेट या दहशतवादी संघटनेने अफगाणिस्तानमध्ये अशाप्रकारचे हल्ले, बॉम्बस्फोट घडवून आणले आहेत.

हे देखील पहा-

मात्र, त्या संघटनेने शुक्रवारच्या हल्ल्याची जबाबदारी स्वीकारली नाही. कुंदूझ या ठिकाणी शुक्रवारी मशिदीत नमाज पठणाकरिता भाविक जमले असताना हा बॉम्बस्फोट घडवून आणला आहे. अफगाणिस्तान मध्ये शियापंथीय अल्पसंख्याक आहेत. तालिबानींनी त्या देशावर कब्जा केल्यावर त्याठिकाणची स्थिती अधिकच बिकट झाली आहे. त्यामध्ये आता नागरिकांवरच हल्ले होत असल्याने परिस्थिती आणखी चिघळत जाण्याची शक्यता आहे.

कुंदूज प्रांताचे पोलीस उपप्रमुख दोस्त मोहम्मद ओबैदा यांनी दिलेल्या माहितीनुसार की, मशिदीमध्ये असलेल्या भाविकांपैकी बहुसंख्य भाविक या बॉम्बस्फोटात ठार झाले आहेत. आत्मघाती हल्लेखोरामार्फत हा बॉम्बस्फोट घडवून आणला आहे. सर्वांच्या रक्षणाकरिता तालिबान सरकार योग्य उपाययोजना करणार असल्याची माहिती देण्यात आली होती.

Edited By- Digambar Jadhav