तामिळनाडूतील करूर जिल्ह्यात अभिनेता विजय थलपथीच्या रॅलीत झालेल्या चेंगराचेंगरीत ३१ जणांचा मृत्यू झालाय. तमिळगा वेट्टी कझगमचे नेते आणि अभिनेता विजय यांनी ही रॅली आयोजित केली होती. रॅलीदरम्यान अचानक चेंगराचेंगरी झाली. रॅलीदरम्यान चेंगराचेंगरी झाली. मृतांमध्ये महिला आणि मुलांचाही समावेश होता. सर्व जखमींवर करूर जिल्हा रुग्णालयात उपचार सुरू आहेत.

हाती आलेल्या माहितीनुसार, करूर येथे उपस्थित असलेले मंत्री एम. सुब्रमण्यम यांनी एक निवेदन प्रसिद्ध केले आहे. "चेंगराचेंगरीत ३१ जणांचा मृत्यू झाला आहे. ४० हून अधिक जखमींवर उपचार सुरू असून त्यांची प्रकृती स्थिर आहे. मृत्युमुखी पडलेल्या ३१ जणांमध्ये १६ महिला, ९ पुरुष आणि ६ मुले आहेत."

दरम्यान या दुर्घटनेनंतर पंतप्रधान नरेंद्र मोदींनी शोक व्यक्त केलाय. त्यांनी सोशल मीडियावर लिहिले की, "तामिळनाडूतील करूर येथे राजकीय रॅलीदरम्यान घडलेली दुर्दैवी घटना अत्यंत दुःखद आहे. "ज्यांनी आपल्या प्रियजनांना गमावले त्यांच्या कुटुंबियांसोबत माझ्या संवेदना आहेत. या कठीण काळात मी त्यांना शक्ती मिळो अशी प्रार्थना करतो. सर्व जखमींना लवकर बरे होण्याची मी प्रार्थना करतो."

तामिळनाडूचे मुख्यमंत्री एम.के. स्टॅलिन यांनीही या दुर्घटनेप्रकरणी शोक व्यक्त केलाय. करूर येथून येणारी बातमी चिंताजनक आहे. दोन मंत्री आणि स्थानिक आमदार जखमींना मदत करत आहेत. त्यांनी जिल्हाधिकाऱ्यांना सूचना दिल्या आहेत. गर्दीत बेशुद्ध पडलेल्या आणि रुग्णालयात दाखल झालेल्यांना तात्काळ वैद्यकीय मदत द्या. मी शेजारच्या तिरुचिरापल्ली जिल्ह्याच्या मंत्र्यांना युद्धपातळीवर सर्व आवश्यक मदत पुरवण्याचे निर्देश दिले असल्याचं मुख्यमंत्री एम.के. स्टॅलिन म्हणाले.