जंतरमंतरवरील आंदोलनात सहभागी झालेल्या विद्यार्थ्यांवर लाठीमार केल्याप्रकरणी केंद्रीय गृहमंत्री अमित शाहांनी संसदेत चर्चा करावी. शाहा हे संसदेतून पळ काढत आहेत, असा गंभीर आरोप कॉक्रोच जनता पार्टीचे संस्थापक अभिजीत दिपके यांनी केला आहे. दिल्लीतील जंतर-मंतर मैदानावर आंदोलनाचा 'सीझन २' लवकरच सुरू होईल, अशी मोठी आणि महत्वाची घोषणा देखील दिपकेंनी केली. इन्स्टाग्रामवरील चाहत्यांच्या आणि समर्थकांच्या प्रश्नांना उत्तर देताना त्यांनी ही माहिती दिली.

जंतरमंतरवरील विद्यार्थ्यांच्या आंदोलनामुळं धर्मेंद्र प्रधान यांना शिक्षण मंत्रिपदाचा राजीनामा द्यावा लागला. आता कॉक्रोच जनता पार्टीचे संस्थापक अभिजीत दिपकेंनी मोठी घोषणा केली. जंतरमंतरचा सीझन-२ लवकरच येणार आहे, असे दिपके म्हणाले. अनेक जण इन्स्टाग्रामवर कमेंट करत होते की जंतरमंतरचा सीझन २ कधी येणार आहे. पण सीझन २ लवकरच येईल, असं त्यांना मी या माध्यमातून सांगतो, असं दिपके म्हणाले.

नीट पेपरफुटीनंतर दिल्लीतील जंतरमंतर मैदानासह देशातील विविध भागांत विद्यार्थ्यांनी आंदोलन केले होते. जंतरमंतरवरील आंदोलनात सीजेपीच्या अभिजीत दिपकेंच्या नेतृत्वात विद्यार्थ्यांसह पालकही सहभागी झाले होते. संसदेवरही मोर्चा काढण्यात आला होता. त्यावेळी दिल्ली पोलिसांनी आंदोलकांवर लाठीमार केला. त्यानंतर आंदोलक अधिक आक्रमक झाले. आंदोलनाची धार वाढली. अखेर धर्मेंद्र प्रधान यांना शिक्षण मंत्रिपदाचा राजीनामा द्यावा लागला.

झारखंड विद्यार्थी आंदोलनावर काय म्हणाले दीपके?

तत्पूर्वी, अभिजित दीपके यांनी मंगळवारी झारखंडमधील आंदोलक विद्यार्थ्यांवरील लाठीमाराच्या घटनेचा निषेध केला. विद्यार्थी आपल्या हक्कांसाठी लढत आहेत, व्होट बँकेसाठी नाही. केवळ आंदोलन करणारे विद्यार्थी आणि तरुणच पोलिसांच्या कारवाईला का सामोरे जातात? राजकीय पक्षांचे कार्यकर्ते का नाहीत? असा सवाल त्यांनी केला.