मध्य प्रदेशमधून धक्कादायक बातमी समोर आली आहे. एक तरुणींच्या गटाने चाकूचा धाक दाखवत काही तरुणीचं अपहरण केलं आणि त्यांचा अमानुष छळ केला. धक्कादायक म्हणजे या तरुणींनी हा सगळा प्रकार फक्त सोशल मीडियावर व्हायरल होण्यासाठी केल्याचं उघडकीस आलं आहे. या प्रकरणी पोलिसांनी ३ तरुणींना ताब्यात घेतलं असून पुढील चौकशी सुरु आहे.

सोशल मीडियावर व्हायरल झालेल्या एका व्हिडिओनुसार, एका तरुणींची टोळी काही अज्ञात तरुणींचे अपहरण करून त्यांना अमानुष त्रास देताना दिसत आहेत. याशिवाय आरोपी तरुणींनी पीडितेच्या चेहऱ्यावर धूम्रपान केलं आहे. तर दुसऱ्या क्लिपमध्ये, ती पीडितेला शिवीगाळ करताना लाथ मारताना आणि कानाखाली मारताना दिसत आहे.

मिळालेल्या माहितीनुसार, ही टोळी नेहमीच मुलींना चाकूचा धाक दाखवून अपहरण करायची. त्यांना निर्जनस्थळी घेऊन जायची. मारहाण करताना व्हिडिओ रेकॉर्ड करायचे आणि नंतर ते व्हिडिओ इंस्टाग्रामवर अपलोड करायचे. असाच एक व्हिडिओ व्हायरल झाल्यानंतर, एका पीडितेने ग्वारीघाट पोलिस स्टेशनमध्ये जाऊन एफआयआर दाखल केला. व्हायरल व्हिडिओ गांभीर्याने घेत पोलिसांनी टोळीत सहभागी असलेल्या ३ मुलींना अटक केली.

पोलिसांनी दिलेल्या माहितीनुसार, आरोपींमध्ये कांचघर परिसरातील २ अल्पवयीन मुली आणि एका तरुणीचा समावेश आहे. २ अल्पवयीन मुलींना बालसुधारगृहात पाठवण्यात आले आहे, तर एका आरोपीला तुरुंगात पाठवण्यात आले आहे. पोलिसांनी असेही सांगितले की, तिन्ही मुलींपैकी कोणत्याही मुलीचा पूर्वी कोणताही गुन्हेगारी रेकॉर्ड नव्हता. त्या फक्त सोशल मीडियावर प्रसिद्धी मिळविण्यासाठी आणि रीलवर व्ह्यूज मिळविण्यासाठी हे कृत्य करत होत्या. ग्वारीघाट पोलिस संपूर्ण प्रकरणाचा तपास करत आहेत.