ही दृश्य आहेत. पुण्यातील येरवडा प्रादेशिक मनोरुग्णालयातील. जिथं महाराष्ट्रभरातून मनोरुग्ण मानसिक आजारातून सावरण्यासाठी येतात. ते मनोरुग्णालय आता झालंय छळछावणी. ही दृश्य पाहीलीत की तुमची खात्री पटेल कारण जे मनोरूग्ण इथे आजारावर उपचार घेण्यासाठी आलेत त्यांनाच साफसफाईला जुंपलय.त्यांच्याकडून स्वच्छतागृह साफ करून घेतली जातायत, कुठे मैला उपसणं तर कुठे कपडे धुतलेल्या गाड्या ओढण्याचं काम मनोरुग्णांकडून करून घेतलं जातयं.

खरंतर येरवडा प्रादेशिक मनोरुग्णालयात राज्यभरातील मनोरुग्ण उपचार घेण्यासाठी दाखल होतात. या रुग्णालयातील 15 वार्डात सध्या 920 मनोरुग्ण उपचार घेत आहेत. आम्ही जेव्हा येरवडा प्रादेशिक मनोरुग्णालयात पोहचलो तेव्हा या मनोरुग्णांची नेमकी काय परिस्थिती समोर आली. तुम्हीच पाहा.

येरवडा मनोरुग्णालयात मनोरुग्णांकडून टॉयलेट, मैला स्वच्छतेचं काम करून घेतली जात होती. ढकलगाडीतून कपडे, जेवण वाहून नेण्याचं कामही मनोरुग्ण करत होते.ही काम करण्यासाठी रुग्णालयातील कर्मचाऱ्यांकडून मनोरुग्णांचा छळ होत असल्याचाही आरोप आहे. तसचं वॉर्डच्या आजूबाजूला घाण, दुर्गंधी, दारूच्या बाटल्यांचा खच असल्याचंही पाहयला मिळालं. मनोरुग्ण अस्वच्छ तर होतेच पण त्यांच्या अंगावरील कपडेही स्वच्छ नव्हते. मनोरुग्ण कक्षातील बेड, फरश्या, बाथरूमची अवस्था दयनीय होती. मनोरुग्णालयात नवीन रुग्णांना वेळेवर दाखल करून घेतलं जात नसल्याच्याही तक्रारी आहेत.

दुसरीकडे याप्रकरणी सखोल माहिती मिळवण्यासाठी साम टीव्हीनं मनोरुग्णालयाच्या अधीक्षकांना गाठलं. त्यावेळी ठेकेदारांच्या कर्मचाऱ्यांनीच हा प्रकार केल्याचं स्पष्टीकरण अधीक्षकांनी दिलयं. हा प्रकार समोर आल्यानंतर जागं झालेल्या प्रशासनानं मनोरुग्णांना कामाला लावणाऱ्या कर्मचाऱ्यांविरोधात कारवाईचे आदेश देण्यात आलेत. तसचं ठेकेदारालाही काळ्या यादीत टाकण्याची शिफारस राज्य सरकारकडे करण्यात आलीय. मात्र मनोरुग्णाची अशी परवड होत असताना प्रशासकीय यंत्रणा कुठे झोपली होती. घटनेची माहिती माध्यमांसमोर आल्यानंतर कारवाईचा बडगा उगारून हात झटकण्याचा प्रयत्न करणारी यंत्रणा स्वत: मनोरुग्ण झालीय का? याचा विचार होणं गरजेचं आहे.