फैय्याज शेख, साम टीव्ही

राज्यातील सर्व नगरपरिषद आणि नगरपंचायतीचे निकाल जाहीर झाले. पालघरमध्ये नगरपंचायतीचाही रविवारी निकाल जाहीर झाला. या निवडणुकीत एका प्रभागातून भाजप नगरसेवक तेजेश पाटील विजयी झाले. या निकालानंतर विजयी मिरवणूक काढताना मोठा राडा झाल्याची घटना घडली. या विजयी मिरवणुकीदरम्यान भाजप कार्यकर्त्यांनी दोन महिलांना मारहाण केल्याची घटना समोर आली आहे.

पालघर जिल्ह्यातील वाडा नगरपंचायत निवडणूक निकालानंतर भाजपा नगरसेवक तेजेश पाटील यांच्या मिरवणुकीत सीएनजी गाडीसमोर फटाके वाजविण्यास विरोध करणाऱ्या दोन महिलांना मारहाण झाल्याची घटना घडली. वाडा शहरात रविवारी दुपारी ही घटना घडल्याचे समोर आले आहे.

या महिलांवर वाडा ग्रामीण रुग्णालयात उपचार सुरु आहेत. वाडा पोलीस स्टेशन मध्ये महिलांच्या नातेवाईकांनी तक्रार दाखल केली आहे . आरोपींना अटक तात्काळ करण्यात यावी अशी जखमी महिलांची सरकारकडे मागणी आहे.

भाजपचे विजयी नगरसेवक तेजेश पाटील यांची मिरवणूक आमच्या घरासमोर आल्यानंतर आमच्या कारवर फटाक्याची माळ फोडली असताना सीएनजी गाडीसमोर आम्ही त्यांना विरोध केला. त्यांनी आम्हाला शिवीगाळ करून महिलांना मारहाण केली. सरकारकडे आमची मागणी हे आरोपींना तात्काळ अटक करा, अशी मागणी महिलांनी केली.

सोलापुरात निवडणुकीच्या निकालानंतर दगडफेक

सोलापूरच्या बार्शी नगरपरिषद निवडणूकीला गालबोट लागल्याची घटना घडली आहे. बार्शी नगरपरिषद निवडणूक निकालानंतर दोन गटात तुफान दगडफेक झाली. या दगडफेकीचा संपूर्ण प्रकार सीसीटीव्ही कॅमेऱ्यात कैद झाला आहे. सोलापूरच्या बार्शीतील आयनापूर मारुती रोड परिसरात सर्व प्रकार घडला आहे. दरम्यान ही दगडफेक नेमकी कोणत्या करणामुळे झाली हे समजू शकले नाही.