मुंबईतील वडाळा-कासारवडवली मुंबई मेट्रो-४ ग्रीन लाइनवरील मुलुंडमधील एलबीएस रोडवर बांधकाम सुरू असलेल्या मेट्रोचा स्लॅब कोसळल्याची घटना घडली. या दुर्घटनेत एकाचा मृत्यू झाला आहे. तर तिघे जण गंभीर झाले असून त्यांच्यावर रुग्णालयात उपचार सुरू आहेत. यात उत्तर प्रदेशमधील एका गावचे सरपंच रामधनी यादव यांचा मृत्यू झाला आहे.

वडाळा-ठाणे-कासारवडली मेट्रो मार्गिकेचं काम सुरू असताना शनिवारी दुपारी साडेबारा वाजण्याच्या सुमारास मेट्रोचा स्लॅब कोसळल्याची दुर्घटना घडली. यादरम्यान रस्त्यावरून जात असलेल्या रिक्षा आणि कारवर कोसळला. स्लॅब कोसळल्याने एकाचा जागीच मृत्यू झाला. तर तिघे जखमी झाले. या दुर्घघटनेनंतर राज्य सरकारने दिवगंत सरपंच रामधनी यादव यांच्या वारसाला ५ लाखांची मदतीची घोषणा करण्यात आलीये.

नेमकं काय घडलं?

उत्तर प्रदेशच्या जौनपूर जिल्ह्यातील सरपंच रामधनी यादव आणि माजी सरपंच महेंद्र यादव हे मुंबई फिरायला आले होते. सरपंच यादव यांच्या मित्राचे मुलुंडमध्ये ऊसाचे दुकान आहे. मित्राची भेट घेतल्यानंतर सरपंच रामधनी हे नातेवाईकाच्या घरी लग्नासाठी रिक्षाने निघाले. या रिक्षात सरपंच रामधनी यादव, माजी सरपंच महेंद्र यादव, रिक्षाचालक बबलू यादव होते.

दुपारच्या सुमारास मेट्रोचा स्लॅब कोसळून सरपंच रामधनी यादव यांचा जागीच मृत्यू झाला. सरपंच रामधनी यांच्या मृत्यूची माहिती मिळताच यादव यांच्या कुटुंबीयावर दु:खाचा डोंगर कोसळला. त्यांच्या मृत्यूने गावात शोककळा पसरली आहे. रामधनी यांच्या नातेवाईकांनी दोषींवर कठोर कारवाई करण्याची मागणी केली आहे. सरपंच रामधनी यादव आणि माजी सरपंच महेंद्र यादव हे दोन दिवसात गावी उत्तर प्रदेशात जाणार होते. मात्र, घरी जाण्यापूर्वी त्यांचा दुर्घटनेत मृत्यू झाला.