Borivali Crime News: लॉकडाऊनमुळे तरुणाची नोकरी गेली आणि त्याने झटपट पैसे कमावण्यासाठी नागरिकांची फसवणूक करण्यास सुरुवात केली. या तरुणाची पहिली शिकार बोरिवलीतील एक वृद्ध महिला ठरली.

या वृद्ध महिलेचे विविध कंपन्यांतील तब्बल तीन कोटींहून अधिकचे शेअर दुसऱ्या खात्यात वळवून फसवणूक करणाऱ्या दिल्लीच्या या ठगाला बोरिवली (Borivali) पोलिसांनी अटक केली. नरेश सिंग असे अटक केलेल्या तरुणाचे नाव आहे. नोकरी गेल्याने उदरनिर्वाहासाठी नरेशने हे कृत्य केल्याचे तपासात कबुल केले आहे. (Mumbai Latest News)

मिळालेल्या माहितीनुसार, बोरिवलीत राहणाऱ्या ज्येष्ठ महिलेने विविध 43 कंपनीचे शेअर ब्रोकिंग एजन्सीच्या माध्यमातून विकत घेतले होते. मात्र शेअरवरील कागदपत्रांमध्ये पत्ता व नावात बदल करण्यासाठी पत्रव्यवहार केला नसतानाही पत्र आल्याने महिलेला संशय आला आणि तिने ब्रोकिंग एजन्सीकडे संपर्क साधला. यानंतर अज्ञात ठगाने (Fraud) तक्रारदार यांचे डिमॅट खाते आणि राहण्याचा पत्ता बदलल्याचे समजले. यासाठी तक्रारदार महिलेची बनावट सही देखील केली असल्याचं समजलं. यातूनच 3 कोटी 14 लाख रुपयांच्या शेअर्सची परस्पर विक्री केल्याचे आढळून आले.

आपली फसवणूक झाल्याचे लक्षात येताच तक्रारदार महिलेने बोरिवली पोलीस ठाण्यात धाव घेऊन अज्ञात ठगाविरुद्ध फसवणुकीचा गुन्हा दाखल केला. बोरिवली पोलिसांनी आरोपीला दिल्ली येथून अटक केली असून सध्या आरोपीला पोलीस कोठडी मिळाली आहे. या प्रकरणाचा बोरीवली पोलीस अधिकचा तपास करत आहेत.

Edited By - Akshay Baisane