Nagpur MLC Election : नागपूर शिक्षक मतदारसंघाच्या निवडणुकीत महाविकास आघाडीने भाजपला जोरदार धक्का दिला आहे. फडणवीसांच्या बालेकिल्ल्यातच महाविकास आघाडीचे उमेदवार सुधाकर अडबाले हे विजयी झाले आहेत. त्यांनी भाजप पुरस्कृत उमेदवार नागोराव गाणार यांचा दारुण पराभव केला. दरम्यान, भाजपच्या या पराभवानंतर शिवसेना उद्धव ठाकरे गटाने आपली पहिली प्रतिक्रिया दिली आहे.  (Maharashtra Political News)

शिवसेना उद्धव ठाकरे गटाचे खासदार विनायक राऊत यांनी मुंबईत माध्यमांसोबत संवाद साधला. यावेळी त्यांनी नागपुरात महाविकास आघाडीचा विजय आणि भाजपचा पराभव झाल्यानंतर भाजप नेत्यांना चांगलचं डिवचलं आहे. (Latest Marathi News)

राज्याचे उपमुख्यमंत्री  देवेंद्र फडणवीस (Devendra Fadnavis) आणि भाजपचे प्रदेशाध्यक्ष चंद्रशेखर बानवकुळे यांच्या सारख्या नेत्यांची राजकीय प्रस्थ असलेला हा मतदारसंघ आहे. यामध्ये महाविकास आघाडीने विजय मिळवून भाजप आणि मिंथे गटाचा पराभव केला आहे, असं विनायक राऊत म्हणाले.

नागपुरात झालेला हा पराभव देवेंद्र फडणवीस आणि चंद्रशेखर बानवकुळे यांचा आहे, असंही ते म्हणाले. नागपूरमधील सर्व मतदारांनी दाखवून दिलेलं आहे, की सध्याच्या मिंधे सरकारपेक्षा महाविकास आघाडीवर त्यांचे प्रेम आहे. ते प्रेम या निवडणुकीतून दिसून आलं आहे”, असंही विनायक राऊत म्हणाले.

दरम्यान, शिवसेना वंचित युतीबाबत बोलताना विनायक राऊत म्हणाले, महाविकास आघाडी ही मूळ आघाडी आहे. वंचित बहुजन आघाडीसोबत युती करताना अजित पवार यांनी आपली पसंती कळवली होती. महाविकास आघाडीचा वंचितची साथ मिळाली तर गद्दार गटाला धक्का देणारं वातावरण तयार होईल.

Edited By - Satish Daud