अभिनेता टायगर श्रॉफवर हल्ला करणाऱ्या तिन्ही आरोपींना पोलिसांनी अटक केली आहे. पोलीस सूत्रांनी दिलेल्या माहितीनुसार, आरोपींनी या हल्ल्याचा संपूर्ण कट रचला होता. यासाठी त्यांनी टायगर श्रॉफच्या दिनचर्येवर लक्ष ठेवले होते. टायगर दर रविवारी जुहू येथील फुटबॉल मैदानावर खेळण्यासाठी जातो, याची माहिती आरोपींना होती. टायगरवर हल्ला करण्याआधी हे आरोपी ४५ मिनिटे आधीच मैदानाबाहेर पोहोचले होते. टायगर मैदानाबाहेर येण्याची वाट पाहत आरोपी दबा धरून बसले होते.

टायगर श्रॉफ गोळीबार प्रकरणाचा घटनाक्रम

रविवार, १८ ऑक्टोबर २०२६

दुपारी ३ वाजेच्या सुमारास : टायगर श्रॉफ आपल्या नेहमीच्या दिनक्रमानुसार मुंबईतील जुहू येथील जमनाबाई नरसी ग्राउंडवरील फुटबॉल टर्फवर पोहोचला.

संध्याकाळी ५ ते ५.३० वाजेच्या दरम्यान : टायगर श्रॉफने फुटबॉल खेळला आणि चाहत्यांशी संवाद साधला. या संवादाचा व्हिडिओही व्हायरल होत आहे.

संध्याकाळी ७ वाजेच्या सुमारास : जुहूतील पुष्पा पार्कजवळ दुचाकीवरून आलेल्या तीन हल्लेखोरांनी टायगर श्रॉफच्या गाडीवर गोळीबार केल्याचा आरोप आहे. गोळीबारानंतर आरोपी दुचाकीवरून घटनास्थळावरून फरार झाले. जखमी ड्रायव्हरला घेऊन टायगर श्रॉफ नानावटी रुग्णालयाच्या दिशेने रवाना झाल्याचे दिसून आले.

रात्री ८ वाजेच्या सुमारास : जुहू परिसरातून पळून गेल्यानंतर हल्लेखोर अंधेरी पश्चिम रेल्वे स्थानकावर पोहोचल्याची माहिती आहे.

रात्री १० वाजता : मुंबईतून पळून जाण्यासाठी आरोपींनी वसई रेल्वे स्थानकातून पुणे-जयपूर एक्स्प्रेस पकडली.

रात्री ११ वाजता : उपमुख्यमंत्री एकनाथ शिंदे यांनी टायगर श्रॉफच्या निवासस्थानी भेट दिली. त्यांनी टायगर यांच्या प्रकृतीची विचारपूस केली आणि घटनेबाबत त्यांच्याशी चर्चा केली.

सोमवार, १९ ऑक्टोबर २०२६

पहाटे ४ वाजताच्या सुमारास : मुंबई पोलिसांनी तीन अज्ञात व्यक्तींविरोधात भारतीय न्याय संहिता (BNS) आणि शस्त्रास्त्र कायद्यातील संबंधित कलमांनुसार एफआयआर दाखल केला.

१८ ऑक्टोबरच्या रात्रीपासून १९ ऑक्टोबरच्या पहाटेपर्यंत : मुंबई पोलिसांनी रात्रभर तपास केला. सीसीटीव्ही फुटेज तपासून आरोपींनी पळून जाण्यासाठी वापरलेल्या मार्गाचा माग काढण्यात आला.

सकाळी १० वाजता : पोलीस पथकांनी आरोपींच्या हालचालींचा माग काढत ते राजस्थानच्या दिशेने जात असल्याचे शोधून काढले.

सकाळी ११ वाजता : राजस्थानमधील कोटा येथे पोलिसांनी संशयितांना ताब्यात घेतले आणि अटक केली.