विकास काटे, ठाणे प्रतिनिधी

Siddhu Abhange latest news : ठाण्यातील कोपरी परिसरात शिंदे गटाच्या युवासेना कार्यकर्त्याला महिलांनी बेदम मारहाण केल्याची घटना घडली आहे. या घटनेचा व्हिडीओ सध्या सोशल मीडियावर प्रचंड व्हायरल होत आहे. विशेष म्हणजे, पोलिसांसमोरच ही मारहाण झाल्याचे व्हायरल व्हिडीओमध्ये दिसत आहे. मारहाण झालेल्या कार्यकर्त्याचे नाव सिद्धू अभंगे असे आहे.

ठाण्यातील कोपरी परिसरात रविवारी (२७ सप्टेंबर) रात्री सुमारे ११:१५ वाजेच्या सुमारास ही मारहाणीची घटना घडली. जुन्या कपड्यांचा व्यवसाय करणाऱ्या महिलांनी युवासेना कार्यकर्ता सिद्धू अभंगे याला बेदम चोप दिला. या प्रकारामुळे कोपरी परिसरात एकच खळबळ उडाली आहे.

नेमकं काय घडलं?

मिळालेल्या माहितीनुसार, कोपरी परिसरात जुन्या कपड्यांचा व्यवसाय करणाऱ्या महिलांकडे सिद्धू अभंगे याने व्यवसाय सुरू ठेवण्यासाठी पैशांची मागणी केल्याचा गंभीर आरोप महिलांनी केला आहे. "हा व्यवसाय शिवसेनेचे दिवंगत जिल्हाप्रमुख धर्मवीर आनंद दिघे साहेब यांच्या पुढाकाराने व आशीर्वादाने सुरू झाला आहे," असे सांगत संतप्त महिलांनी अभंगे याला जाब विचारला.

त्यानंतर या वादाचे रूपांतर हाणामारीत झाले. संतप्त महिलांनी सिद्धू अभंगे याला कोपरी पोलीस ठाण्याच्या आवारातच बेदम मारहाण केली. थेट पोलीस ठाण्याच्या परिसरातच हा प्रकार घडल्यामुळे काही काळ तणावाचे वातावरण निर्माण झाले होते. याप्रकरणी पोलीस अधिक तपास करत आहेत.