Gaodevi vegetable market Fire : ठाण्यातील प्रसिद्ध गावदेवी भाजी मार्केटमध्ये पहाटेच्या सुमारास भीषण आग लागल्याची घटना घडली आहे. या आगीत मार्केटमधील दुकाने आणि भाजीचे गाळे जळून खाक झाले असून मोठ्या प्रमाणावर नुकसान झाले आहे. आगेची माहिती मिळताच अग्निशमन दलाच्या ३ गाड्या तातडीने घटनास्थळी दाखल झाल्या. अग्निशमन दलाच्या जवानांनी अथक परिश्रम घेत आगीवर नियंत्रण मिळवण्याचे शर्तीचे प्रयत्न सुरू केले.

ही आग पहाटेच्या सुमारास लागल्यामुळे मार्केटमध्ये लोकांची गर्दी नव्हती. सुदैवाने या भीषण आगीत कोणतीही जीवितहानी झालेली नाही, अशी प्राथमिक माहिती मिळाली आहे. गावदेवी भाजी मार्केटला ही आग नेमकी कशामुळे लागली, याचे कारण अद्याप समजू शकलेले नाही. शॉर्ट सर्किटमुळे आग लागली असावी, असा प्राथमिक अंदाज वर्तवला जात असून पोलीस आणि अग्निशमन दलाकडून या प्रकरणाचा अधिक तपास केला जात आहे.